La Usc di Ladins

La strada dla Val Badia por/da Puster Longega–Mantëna Todëscia romagn stlüta inant y é ma anuzabla por i auti de emergënza. La strada tres le ju Furcia é gnüda daurida mefodër sëgn, mo les atres strades de Mareo stlütes da inier incá romagn sarades inant. Al é n gran prigo de loines y ince de roes.

La forza eletrica dal’Edyna
Bele le terzo de é passa 30 ciases y lüsc tla fraziun da Pliscia, danter Sares y Brach, zënza strom (forza eletrica).
Ci che al ó dí ester zënza forza eletrica sá ma chi che é stá n iade plü co 3-5 dis zënza. Chi da Pliscia l’á bele vit l’ann passé por 10 dis alalungia:
– degun scialdamënt (gnanca chël de ciasa zentralisé a gas o gasöre !) aldefora di moguns da paur a lëgna y forgores a lëgna
- degun laur a destanza, no scora a destanza (smart working y home schooling)
- paní de sorëdl che ne laora nia
- degöna löm y degöna ventilaziun
- n gröm de mangiaria (dlaciada ite) che vá ademal
- degun telefon de ciasa o aparac WLAN che funzionëia
- degun fonin y d’atri stromënc digitai cun patrí (zënza che an vais a ciarié sö les patris por ejëmpl t’auto – sce un á l’auto te garasc o daimpró a ciasa)
- degöna televijiun
- degun radio (sce al ne vá a patris)
- degun PC
...

Al é da parenté che na sozieté tan grana y potënta sciöche l’Edyna (dl grup Alperia !) n’ais fistidié da fá i laurs nezesciars aladó dal ann passé incá, do che al ê tomé chë gran nëi amez novëmber.

I abitanc dles viles tla fraziun da Pliscia atocades da chësta enejima lacuna dl sorvisc mëna do la politica locala y provinziala da daidé finalmënter desgropé chësc problem – meton, por jëmpl, les condütes te tera. En chësc ann d’isté â l’Edyna ponsé da trá n cabel bluder da Sares ite fora por bosc sura tera ia: é chësta stada la soluziun?

 (Iaco Rigo)