La Usc di Ladins

Te tröc posć n'é en chësc ann San Micurá nia rové. Por via dl virus y dles restriziuns che mëss gní tignides ite. Mo le grup di Jogn da La Ila, y val' ater grup de Jogn dla valada, á impó orü mantigní chësta bela tradiziun. Ai 5 y ai 6 de dezëmber él rodé fora por les ciases le Sant, acompagné da n angel y da dui malans. Les families á podü prenoté cina le de denant, sce ai orô che San Micurá gniss a ciasa – restan sambëgn de fora – a ti porté na picia scincunda ai mituns y ales mitans. »En chësc ann él sté de manco families che á aposté San Micurá a ciasa – nes cunta la presidënta di Jogn da La Ila Celine Dapoz – Mo impó sunse stá contënc da podëi ti fá na ligrëza ai plü pici. Sciode él ma sté che i n'ún nia podü fá la festa sö dan calonia, sciöche i esson orü.« Te chësc tëmp tan particolar, olache tröp mëss jí sot, él bel y da laldé che les tradiziuns vëgnes mantignides, che almanco i plü pici pois se desmentié por n momënt de leges, normes y restriziuns. Che ai pois se gode l'Advënt y döt ci che alda lapró.  (kp)