Ladins dlafora: Ingrid Canins, nasciüda da geniturs dla Val Badia, mo chersciüda sö a Bornech, s’á fat n bun inom sciöche abelidëssa de interns y falzades. I sun jüs a la ciafé a Aufhofen dlungia Bornech, te na ciasa residenziala storica olache al é passé por secui alalungia le clerus y la cultura
Le zënter dl paisc da Aufhofen ne vëigon feter nia, sce an passa ma cun l'auto por jí y gní a Dietenheim. Sce an se tol dlaurela da se archité, pón conscidré n sit vedl y important de storia, cultura, ert y religiosité. Aufhofen é un di posć plü vedli de Puster, chi agn incër le 1.000 passâ y sojornâ chiló vëschi, prelac y grofs. Te chësc sit y ambiënt storich a Nord de Bornech vir y laora da cater agn incá l’artista Ingrid Canins.
Te n pröm momënt ti vëgnel en mënt ai vijitadus da rové te na ciasa y familia nobilara, bun curada y tignida cun na vijiun y na atmosfera da sté saurí. I locai ampli y alc dá aria y liberté da se tigní sö chiló, y ince na sensaziun da fá pert de na storia che pé passada tla
cronica, mo vir tres ciamó te documentaziun y recorc. La storia ne podunse nia sferié jö, ci che i podun fá é la arlungé cun nosta misciun y vocaziun creativa. Avisa de chësc vers laora Ingrid Canins. Ara se defenësc instëssa na "art director" dl abelimënt intern de ciases y frabicac: "I sun chiló por la jënt che adora na forma particolara de idees y abelimënc, architëc, industriai, ustis, firmes y porsones privates che ó sotrá, depënje o aredé sü parëis de ciasa, o ince cherié salfs particolars por istalaziuns y esposiziuns desferëntes." I baiun de laurs che mët man cun la dediziun y la dlaurela che an adora, por imparé da se conësce, cunté de se intësc y dla vita, asfistié le carater y la filosifa de vita dl cliënt y de so mistier o ci che ti stá a cör. Ingrid Canins: "Mi laurs gareta tres na analisa sota dla porsona y dl contignü, vigni toch (sides chësc drap, motif depënt o d’ater) y estetica á na storia y n messaje avisa." Baié de design n’é aldedaincö nia saurí, les formes y les manires da mëte en at na idea de forma, corú y funzionalité é zënza fin, Ingrid Canins: "I arati che al ne sides nia na definiziun unitara de design, al n’é nia n design generich; tö mëss impormó chirí y ciafé sö le significat de design, degügn ne pó sciampé da se instësc."
Liede do deplü tla ediziun atuala de La Usc di Ladins!
