Le "tapo d’or" vëgn dé ca ann por ann dala ajentöra CasaClima te plü categories por ciases de vigni tipologia y funziun: frabicac privac y publics, residenziai, comerziai, industriai, de costruziun nöia y sostanza storica ressenada. La juria á en chësc ann valuté indöt 1.332 ciases de vigni natöra y fuzniun, sis é stá ala fin i reconescimënc, lapró él gnü le pest da pert dl publich tres i "likes online".
Le pröm tapo d’or dla zerimonia y festa ti é gnü surandé al proiet "Ciasa Le Fiun", lauré fora dal architët Daniel Ellecosta. I esperc dl setur á aprijé y laldé l’interpretaziun dla manira y cultura da frabiché tles viles storiches ladines, dlungia al adatamënt dles condiziuns d’abité familiares ti tëmps moderns. Ince la coesistënza danter tecniches da frabiché y materiai de costruziun tradizionai y moderns é garatada y é da araté efiziënta y sparagnënta.
Le pest dl publich é tres n fat interessant, en chësc iade ti é jü le pest dla litaziun publica danter bëgn 23 finalisć al Condominio CasaClima a Milan, n frabicat plurifamiliar te n sit zentral de Milan.
Foto: Gustav Willeit (Iaco Rigo)
Tapo d’or por la ciasa "Le Fiun"
La zerimonia di pesć CasaClima 2021, 19ejima ediziun, é gnüda inviada ia dan otedé tl Hotel Sheraton a Balsan, cun ala pert danter i protagonisć ince la familia de Simon Pedevilla y Katrin Ellecosta, abitanc dla ciasa nöia Le Fiun tla vila de Rü a La Pli de Mareo, proietada dal architët Daniel Ellecosta d'La Pli de Mareo che vir aldedaincö y laora a Truden. Sotrata y aredada é la ciasa gnüda dala dita Frena Interiors de Ivan Ellecosta, cun sënta a Frena a La Pli de Mareo
Galaria retrac
View the embedded image gallery online at:
https://www.lausc.it/valedes-ladines/val-badia/17091-tapo-d-or-por-la-ciasa-le-fiun#sigProId58e536666c
https://www.lausc.it/valedes-ladines/val-badia/17091-tapo-d-or-por-la-ciasa-le-fiun#sigProId58e536666c
