La Usc di Ladins

Al ne sozed dessigü nia vignidé che an á la poscibilité da ospité le minister por le turism. Chësta ocajiun é indere garatada en domënia ai 23 de jená sön Plan de Corones. Sön invit dl Skirama Plan de Corones y dl Dolomiti Superski él gnü invié a 2.275 metri le minister talian por le turism Massimo Garavaglia. N invit a chël che al á respognü na schira de personalités politiches, aministratives y istituzionales. Garavaglia é rové alerch bele dales 9 da doman, olache al é gnü tut ite pro la staziun a val dl implant nü da Valdaora. A l’aspeté êl le presidënt dl Skirama Zeno Kastlunger y la presidënta dl’assoziaziun nazionala di implantisć ANEF Valeria Ghezze.
La incuntada ofiziala á spo metü man pro la ciampana "Concordia 2000", te n de che s’á mostré da süa plü bela pert. Ala pert êl danter l’ater le presidënt dla Provinzia Arno Kompatscher cun i assessurs Giuliano Vettorato y Arnold Schuler y d’atri rapresentanc provinziai, le prefet Vito Cusumano acompagné da plü rapresentanzes dles forzes dl ordin, i trëi ombolc di comuns de Mareo, Bornech y Valdaora, le presidënt dla IDM Hansi Pichler, le presidënt dla Uniun di Ostis Manfred Pinzger y tanc d’atri. La incuntada de Plan de Corones ê por le minister na ocajiun da vijité söl post chës ativités implantistiches che é gnüdes sostegnides ciamó dan Nadé cun "ristori" dër generusc. Al é ince sté na ocajiun por se baraté fora rengraziamënc, aprijamënc y complimënc, y sambëgn ince por se damané inant aiüt y sostëgn. Chësc é gnü fora tan deplü do la vijita al museum MMM "Corones", pro la conferënza stampa tignida tl gran salf dl "Lumen".

Deplü sön chësta incuntada podëise lí t’La Usc di Ladins di 28 de jená  (pablo)