La Usc di Ladins

Le setur turistich é un de chi che é gnüs atocá deplü dala pandemia. Na sajun da d'invern é tomada fora y les ostires y i ostis n'á l'ann passé nia podü daurí. Mo te chësc tëmp ne ési nia restá frëms a aspeté; al é sté n bun momënt por se confronté, por se baié y por capí che ara jô debojëgn da jí n tru deboriada. Insciö éra stada por önesc ostis y ostires dl'Alta Badia, che á da püch dé vita a n consorz nü, »Dolomites Retreats«, cun le fin de colaboré y de cherié n martl tres chël che ai se presentëia y se fej conësce a ghesć da döt le monn. »La pandemia é stada n momënt dër rî da afronté por nos ostis, dantadöt deache l'ann passé d'invern ne unse nia lauré. Mo al é ince sté n momënt olache i ún podü se archité a ponsé sura, a lauré fora idees y proiec nüs. Al é te chësc tëmp che al é nasciü 'Dolomites Retreats', n consorz che liëia önesc danter ostis y ostires dl'Alta Badia«, spliga la presidënta dl consorz Natalie Mellauner, che dij inant: »Da n grup de compagns él gnü a se l dé chësta idea che nes á porté a colaboré y jí deboriada chësc tru tres la creaziun de n martl te chël che i podun nes identifiché cun nosc teritore y cun chël che i podun nes fá conësce – nos personalmënter cun nostes strotöres – mo plü en general ince l'Alta Badia, a livel internazional.

Adöm cun la presidënta Natalie Mellauner, patrona dl Hotel La Majun da La Ila, fej pert dl consorz diesc d'atri ostis dl'Alta Badia. Deplü podëise lí tla ediziun stampada da incö, vëndres ai 18 de forá.   (kp)