La Usc di Ladins

"Pié ia n'é nia sté saurí iniann", dij le diretur dla Scora de Schi da Corvara, Tomas Deiaco. Do da na sajun olache i maestri – y la scora – ê restá frëms, ân ince en chësc ann dübi che ara podess garaté. Mo ara é jüda bun: i sciori é gnüs adalerch y i maestri y les maestres de schi á podü lauré. Intervista al diretur dla Scora de Schi da Corvara, Tomas Deiaco: 

La Usc: Tomas, co sëise pa piá ia iniann do da n ann che i ês restá frëms?
Tomas: Pié ia n'é en chësc ann nia sté tan saurí. Al ê ciamó na gran malsegurëza: i ne savôn nia can y co che ara foss jüda da daurí, tan de jënt che al foss gnü adalerch, tan de maestri y maestres che i messân tó sö. Al é sté ri da se organisé, na gran desfida, mo tlafinada unse risćé y i ún tut sö düc i maestri y i mëssi dí che ara nes é jüda bun.

Cares é pa stades les maius dificoltés che i ëis messü afronté tratan chësta sajun?
Sciöche indlunch él ince sté te nosta scora deplü maestri y maestres che se á taché le virus y che á messü resté a ciasa en carantena. Chisc maestri unse dagnora messü remplazé, mo dantadöt tratan les edemes da Nadé, canche al ê n gröm de sciori, ne él nia dagnora sté saurí. Miú éra spo jüda de jená, olache al ê n pü' de manco da laur. I ún ince albü sciori che á messü desdí a gauja dl virus. Te chisc caji unse ciaré da ester dër flessibli, da ti jí incuntra ti paian zoruch ci che ai â bele paié ite.


Deplü tla ediziun stampada da en vëndres ai 25 de forá.   (kp)