La Usc di Ladins

Tles ultimes döes edemes él sté impröma a Rina y spo a Antermëia les festes por i 50 agn da prou de siur Paul Campei. Retrac y impresciuns ciafarëise t’La Usc di Ladins di 8 de messé. Chëstes festes sona sëgn ince n pü’ da festes de comié, sce an lí l’ultim comunicat dla Diozeja. Chësc mercui él gnü informé sön les mudaziuns de proi y personal diozejan. Danter chëstes n’él ince öna che reverda siur Paul Campei. Le curat dles sis ploanies dla bassa valada vëgn deslié da dötes sües inciaries, y chësc bele cun le 31 de messé. Al ne sará porchël nia plü curat tles sis ploanies olache al á daidé fora tl ultim tëmp: Rina, Antermëia, San Martin, Lungiarü, Al Plan y La Pli. Al é da capí che chësta mudaziun comportará ince mudaziuns pro les funziuns y tla vita dles ploanies.
La Diozeja á ince comuniché na secunda mudaziun, che reverda Paul Felix Rigo da La Pli, cina ciamó responsabl dl convit dl Vinzentinum a Porsenú. Al á dé zoruch süa inciaria y vëgn deslié da chësta cun i 17 de messé. So post vëgn tut ite da Julia Linder.  (pablo)