La Usc di Ladins

Ai 13 de setëmber s’á incunté chi dla classa dl 1942 de döta la Val Badia por fá festa de iubileum di 80 agn. Al á tut pert 44 iubilars. An á metü man cun la santa mëssa tla dlijia da La Ila, olache n rapresentant dl grup che á organisé la festa, á saludé düc canc y rengrazié dla gran partezipaziun. Siur degan, Iaco Willeit, che á zelebré la santa mëssa, á alzé fora tratan la pordica, cun l’aiüt de n dra y fotografies, le significat y le valur dla vita, che é por i iubilars stada scialdi lungia. La mëssa é gnüda abelida cun orghi da man soná da Lois Kastlunger y cianties ciantades dai iubilars. Al é ince gnü recordé düc i defunc dla classa. Do la funziun él gnü fat la fotografia de grup por recordé chësc bel momënt y dedô é la festa jüda inant tl hotel Miraval a Badia. Chiló an ciafé na buna marëna y an á podü ince se bëre n bun gote, s'la cuntan di agn passá. Cun buna vëia, musiga y de beles cianties án passé n bel domisdé deboriada. Düc é jüs a ciasa dër contënc por la bela festa dër garatada.   (kp)