La Usc di Ladins

Cater ciandëres borjâ bel plan y chitamënter sön alté. Le chît ê tan gran che an podô aldí la conversaziun dles cater pices flames. La pröma dijô: “Iö sun la ciandëra dla pêsc, mo sön chësc monn él veres, sënn, violënza divijiuns y revalités ince danter amisc y parënc, y degügn ne vëgn plü a me chirí". Y ara se destodâ. La secunda dijô: "Iö sun la ciandëra dla fede, mo düc ó ma dagnora odëi y pié ite y mai crëie, insciö ne vëgn plü degügn a me chirí." Y ara se destodâ. La terza dijô: “Iö sun la ciandëra dla ligrëza, mo sön chësc monn él tan de pessimism, descorajamënt y tristëza, y degügn ne vëgn plü a me chirí." Y ara se destodâ. Te chël momënt rovâl adalerch n te’ pice möt che da odëi les trëi ciandëres destodades metô man da pité y dijô: “Porciodí s’ëise pa destodé, insciö él pö massa scür chiló!” Sëgn metô la cuarta ciandëra man da baié: “No pité, möt, cina che mia picia flama resta impiada, n’él nia de pordü, porciodiche cun chëra poste impié dötes les atres. Saste che ch’i sun iö? I sun la ciandëra dla speranza." Sëgn tolô le möt la ciandëra dla speranza y impiâ impara dötes les atres.
Eco ci che le tëmp d’Advënt é: n tëmp de speranza! I orun perié le Signur che al mëtes dagnora sön nosc tru na ciandëra dla speranza.

Wilhelm Curtman (1802-1871), adataziun ladina de Giuvani Pescollderungg