La Usc di Ladins

Ince sce i savun che le movimënt fej bun ala sanité y dëida da prevegní malestri y maraties, passunse tres plü tëmp sentá. Y chësc ne fajunse nia ma nos adulc. Bele i plü pici, mituns y mitans, mo ince jogn y jones stá tröp plü sentá co dandaia: te ciasa a soghé, o sön canape a ti ciaré ala televijiun o a se tripé cun fonins y videojüc. Chësta »coia«, sce an pó ti dí insciö, atoca n pü döta la sozieté y pëia ia dai geniturs, che ne ti dá gonot nia le bun ejëmpl a sü mituns. »Sce le tati y la mama stá dagnora ma sentá y ne fej degun sport saral plü ri che i mituns y les mitans mëtes man da pratiché val' ativité«, dij l'insegnant de ginastica y espert de movimënt Davide Moling. Al foss porchël important che i geniturs jiss danfora cun le bun ejëmpl. »I vëighi gonot families, dantadöt mames, che passa tröp tëmp te bar cun sü mituns. I ne diji pa nia che an ne pois nia jí te n bar, mo por i mituns fossel cotan plü sann sté alaleria, te n parch dai jüc o te bosch olache ai pó soghé, se möie y sperimenté«, dij inant Moling, che n'ó cun chësc nia dí che an mëss pratiché sport vigni de mo, sce an ó fá na vita sana, vara debojëgn da ciafé n bun ecuiliber danter sport, movimënt y comodité.

Deplü podëise lí tla ediziun stampada de nosc foliet che vëgn fora en vëndres ai 3 de merz.   (kp)