La Usc di Ladins

Al é un di apuntamënc tradizionai dl’aisciöda – le campionat austriach de orghi da man, che é gnü a s’al dé tla fin dl’edema passada a Stainz tla Südsteiermark y á odü sön paladina indöt 250 sonadus danter 6 y 32 agn. A chësc concurs pó tó pert ince sonadus de Südtirol y sciöche ara é stada ti agn passá, é indô jü fora n bel grup de 16 scolares y scolars dl maester Eduard Huber da Peraforada. Bele plü gonot éson gnüs zoruch cun de bi resultac y insciö n’ál mancé gnanca en chësc iade les sodesfaziuns. La maiú ligrëza é garatada tla categoria C, olache i scolars de Südtirol á curí döt le podest: Matteo Willeit da La Pli é gnü campiun austriach, Emanuel Frenademetz d’Al Plan é gnü secundo y Aylin Trojer da Winnebach é gnüda terza. Tla categoria E él sté Pire Ellecosta da La Pli che s’á metü a saul le terzo post. 

T’La Usc di Ladins di 26 de ma podëise lí deplü sön i atri bi resultac de nüsc sonadus.  (pablo)