La Usc di Ladins

Do la fasa pandemica é ince la biblioteca Sas dla Crusc indô piada ia cun sbunf, pitan fora por l’invern y l’aisciöda deplü ativités y manifestaziuns. A chësta moda á indô metü pe sides gragn co pici vijitadus te biblioteca, demostran interes por i sorvisc desvalis che vëgn pitá. 
Baldi él tres indô da constaté, che tröc conësc püch la biblioteca, süa funziun y i sorvisc che ara pita.

Funziun y sorvisc

La biblioteca Sas dla Crusc toma sot ala definiziun de „Talschaftsbibliothek“, che oress dí biblioteca de val publica. Chësta n’á nia ma la funziun da i pité a döta la jënt dla valada la posciblité da impresté fora mediums de vigni sort debann, mo ince chëra da tigní sö ci che vëgn scrit y publiché localmënter. La funziun é chëra de na strotöra che dais la poscibilité al zitadin da rové pró informaziuns, da se informé, se formé y se istruí, zënza gní limité por süa proveniënza o so stat sozial. Insciö sostëgn la biblioteca publica la parité de chances por l’istruziun. 
Particolar é le sistem organisatif dla biblioteca de val, che se formëia dal coliamënt danter   biblioteches de paisc, cun condiziun de filiala, che é liades a öna na grana, cun funziun de biblioteca zentrala. Te chësta biblioteca vëgnel fat ia laurs liá al’aministraziun, al prozes de preparaziun dl liber denant che al pois gní impresté fora y ince döt ci che reverda l’organisaziun de manifestaziuns y ativités. Te nosta valada él la biblioteca a La Ila che tól ite chësta funziun de biblioteca zentrala. Indöt pita les biblioteches de valada incë 34.000 mediums, danter chi che la beletristica y i libri da mituns é chi plü damaná dal publich, che se mët adöm en gran pert dales families cun i mituns, les ëres y jënt atempada.

Liéde inant deplü tla reportaja realisada dala redadëssa nöia dl foliet a La Ila Milena Obwegs tla ediziun atuala gnüda fora en vëndres!