La Usc di Ladins

Do la dezijiun tuta a unanimité da lascé Aunejia inant tla lista di sic patrimone Unesco, á le Ombolt Luigi Brugnaro dé jö chësc comënt:
"La dezijiun tuta dal Comité dl Patrimone Mondial dla Unesco é garatada al’unanimité: chësta é la desmostraziun de coche al sides gnü reconesciü da düc i sforc che i metun en aziun, a vigni livel istituzional, por la straverda de Aunejia, y che la proposta de inserimënt tla 'danger list' é stada dër tröp politica y püch tecnica.
I ún acordé n sistem cun le Govern por valorisé dötes les aziuns, concretisades te ac aministratifs y investimënc economics, por le dagní de Aunejia. L’introduziun, delibrada dan da püch, dl contribut de azes é öna dles normes, dessigü nia la sora, aviades por sconé lal cité dal 'over tourism', che i sun tl laur da apliché a Aunejia y che i metun a desposiziun de d’atri sic. I oress recordé che i pröms a amé Aunejia é i aunejians, de mer y de tera, che crëi tl dagní de nosta cité, che se rofej do l'ega alta dl 2019 y la pandemia. Cun umilté, coraje y capazeria.
I rengraziëii le Minister dla Cultura Gennaro Sangiuliano y le MAECI cun la Sotsecreteria cun delega al’Unesco Maria Tripodi, che á lauré, deboriada cun sües strotöres, cun nos te chisc mëisc por arjigné ca les dërtes respostes al dossier sön Aunejia. N dilan ince ala delegaziun che é a Riyad chisc dis, menada dal Diretur General Morris Ceron, adöm al vizeombolt Andrea Tomaello y al assessur al Ambiënt Massimiliano De Martin, por soporté l’Ambasciadú talian. N bel gran laur de scuadra por nosta cité!"