La Usc di Ladins

Cun l’aisciöda dl 2025 á metü man ofizialmënter l’ativité dl Club Rodes Val Badia sön le pumptrack nü a San Linert de Badia. A chësta stro­töra nöia á i mëmbri dl’uniun y i apa­scioná de roda aspeté valgamia dî; apresciapüch carant’agn él passé da canche al gnô baié por le pröm iade tl Comun de Badia da fá sö na pista por les rodes. 
»Ti agn 80’ êl n gran interes devers dla bmx. Deplü ê i mëmbri dl club che â ligrëza cun chësta sort de roda y ê interessá da jí inant y tó pert a competiziuns. Porchël êl gnü fat chësta pro­posta da fá sö na pista. Inlaota ne baiân nia ciamó de pumptrack, mo de na pista da bmx, che â sambëgn so cost. Te chël momënt ne jôra nia da la realisé, ajache al manciâ la despo­nibilité dl grunt y les ressur­ses finan­ziares. Cun le 2020 á la propo­sta podü gní tuta en conscidra­ziun y an á podü ponsé ala realisaziun de n pumptrack«, cunta le surastant dl Club Rodes Val Badia Igor Tavella. 

Tl isté dl 2024 é rová a piz i laurs pro le pumptrack, por chël che le Comun de Badia á dé ca grunt y á surantut les spëises. Al é gnü ciafé la lerch tl areal sura la Ciasa Jan Batista Runcher y cun le mëte­man dl 2025 ti á le Comun de Badia surandé la ge­stiun dla strotöra al Club Rodes Val Badia, inciarié da se cruzié dla manutenziun ordinara. 
Da d’aisciöda dl 2025 s’ál ince in­junté na tofla, che spliga les regoles da tigní ite tratan l’anuzamënt y implü vëgnel porté dant val’ funziun interessanta, dantadöt por chi che se mët ion ala proa.


Liede inant tla ediziun nöia da incö, vëndres ai 3 de messé!