La Usc di Ladins

I se recordun la picia revoluziun aprovada dales döes ciamenes por le smendrimënt dl numer de deputac y senaturs tl altonn, sëgn pé döt indó sciöche denant: ma che düc i zitadins dla Talia podará dí la süa te n referendum confermatif zënza quorum!

Le test che i litadus ciafará dant trata le test de lege costituzionala che müda i articui 56, 57 y 59 dla Costituziun tla materia de smendrimënt dl numer de parlamentars. Le Parlamënt l’â aprové, le confermunse?

Cun la lege costituzionala nöia vëgnel smendrí le Parlamënt de 345 "poltrones" (115 tl Senat y 230 tla Ciamena di Deputac), ci che ne i plej nia a düc: sciöche an á podü odëi da dezëmber incá, dantadöt nia ai Senaturs de Forza Italia y dla Lega.

Co vara pa inant? Anter dui mëisc á Palazzo Chigi da fissé le terminn dl referendum aladó de scadënzes dades dant, chël ó dí tla pratica danter la fin de merz y la pröma domënia de jügn.

Interessant saral da odëi tan de zitadins dl Süd che dijará de sce a smendrí le Parlamënt, tl referendum metü dant dl 2016 da Renzi-Boschi á avisa chisc arozé les intenziuns che fajess sparagné al Stat n gröm de spëises, mo smendriss tl medem momënt ince le livel alt de rapresentanza democratica che la Talia á.