La Usc di Ladins

L’à inom Vicino@TE l servije informatich che ge permet ai parenc di malé ricoveré te la strutures dedichèdes a la persones ciapèdes da Covid-19 de aer informazions sun chi de cèsa. Vicino@TE l’é n portal Web/App che consent de aer i boletins medics o de domanèr informazions sul parent, ciapèr retrac o video de la persona o manèr dediches e messajes de vejinanza e de afet.

L’é stat envià tel repart de anestesìa e reanimazion de Roveredo e l’intenzion l’é chela de l’ativèr ence ti etres partimenc Covid de l’Apss, donca te duc i etres ospedèi.

Te chest particolèr moment che i malé de Covid-19 cogn stèr en isolament e i parenc no pel i veder e ge rejonèr l’é nasciù apontin l besegn de poder endrezèr al miec i momenc informatives coi parenc di ricoveré per i fèr sentir a vèlch vida vejins a chi de cèsa.

Per chest i dotores de la reanimazion de Roveredo à proponet la realisazion de n strument che permete de responer ai cruzies di parenc su la situazion clinica del malà e sul besegn de sentir sia vejinanza.

I dotores - descheche à spiegà l dotor Giovanni Pedrotti, diretor de l’unità operativa de reanimazion e anestesìa de Roveredo - ciarea su l’aplicazion n retrat e la informazions cliniches del malà che ge vegnarà manà al parent che l cognarà se coleèr a l’aplicazion. A chesta vida chi de cèsa pel semper saer coche stèsc l pazient e domanèr informazions o schiarimenc sun sia sanità. L’é na vida per i fèr sentir vejins ence percheche no i pel jir e stèr apede fisicamenter al malà.”

L servije l’é stat endrezà via da n grop de tecnics, aministratives e dotores de l’Apss, ence de gra a la colaborazion de na sozietà informatica del Trentin coordenèda dal Servije politiches per l’aministrazion digitèla. 

Vicino@TE doura i dac personèi di malé e parenc con resservateza e segureza e l’é de proprietà de l’Apss che pel ge l conzeder desche servije ence a autra strutures sanitères de la Tèlia.


 (mci)