La Usc di Ladins

Nemo propheta in patria: na parlèda latina per rejonèr de chi che é bogn de se vadagnèr n bon inom foradecà zenza aer massa conscidrazion te cèsa. Te chest cajo, viapura, l me vegn bon per rejonèr de n liber che no rua da dalonc e recordèr che ence te noscia picola realtà l é scritores da poder lejer bel de gust. Voi donca ve meter dant »Perché succederà ieri?«, liber manà fora da Salani e scrit da nosc vejin de cèsa Giacomo Panozzo. Storich e divulgator fiamac, dant che scritor, che te set capitoi dassen enteressanc l à cernù de serèr su na mencianza che à se pel dir duta la persones che abie serà su n percors de formazion enscin a la scola auta: l vet storich che va da la Seconda Vera, olache più o manco fenesc i programes de scola, enscin a la realtà moderna. Panozzo, donca, l vel ne dèr i struments per capir i fac de noscia strenta atualità, ne metan dant na letura utola, ironica e gustegola di avenimenc che ne à portà a viver l prejent coscita coche l cognoscion.

Conseasse »Perché succederà ieri?« per chel che de più banal se pel dir de n liber: perché l é bel. No semper n saggio, per tant che l sie utol, l pel esser conscidrà ence n passatemp. Giacomo Panozzo, enveze, con sia ironia e sie scriver de spirit, l é bon de entrategnir e devertir (didà ence da gustegola ilustrazions satiriches). E contèr fac tant vejins a nesc temp ge dèsc ence l met de fèr viver la storia da protagonisć, de ne fèr jir ite ti fac descheche se i fossa do a sozeder apontin te chest moment.

De più su La Usc stampèda de en vender ai 4 de setember del 2026