La Usc di Ladins

Per duta la scomenzadives sul tem de la demenzes, setember l é l meis dedicà per ezelenza, dal moment che belapontin te chest meis te dut l mond se bina la desvaliva esperienzes de reflescion e de sensibilisazion su la malatia del Alzheimer e su l’autra formes de demenza.

Anter la azions del Pian Trienal 2026-2028 del Comun General de Fascia l é pervedù ence scomenzadives leèdes a Setember – Meis del Alzheimer.

Chest an, con scomenzadiva del Comun de Ciampedel, sarà na scontrèda te piaz mingol desvaliva da la solites, dal titol »Incontriamoci a Campitello – Se troon a Ciampedel«. Col didament di partezipanc al Zenter de enconter ‘Star Ensema’ sarà l met de viver na esperienza viventèda da letures e ativitèdes che enviarà a la reflescion personèla e coletiva sul tem de la demenzes.

L Piaz de Ciampedel vegnarà fornì su con carieghes percheche se posse stèr senté ju sorì e vegnarà metù fora ence la banches ‘Per na comunanza Amica de la persones con demenza’ fates dal Laboratorie de tislerai ‘Ensema’ de la Coprativa Oltre su encèria del Comun General de Fascia tel chèder del Pian Trienal 2023-2025. Chesta sarà ence l’ocajion per sia prejentazion ofizièla con la benediscion da man de don Mario Bravin. L apuntament, endrezà dal Comun de Ciampedel con l Comun General de Fascia, la Sociazion Rencureme e la Coprativa Le Rais, l é en mercol ai 9 de setember da les 10:00 te Piaz de Ciampedel. Duc é envié a la scontrèda che se serarà su con n bon mezmesdì enjignà da la Coprativa Oltre.

Amò apede, ai 21 de setember, per zelebrèr la Giornèda Mondièla Alzheimer, la Sociazion Rencureme, en colaborazion col Comun de Pardac, la envia duc a veder l film »Familiar Touch« al chino de Pardac.

De più su La Usc stampèda de en vender ai 4 de setember del 2026

 (CT)