La Usc di Ladins

La desfida é grana por tröc. Le dolur da perde porsones dlungia, la tëma da perde söa esistënza, nia savëi coche ara jará ennant. Döt chësc pó ester n gran pëis. N sentimënt de solidarieté, n sentimënt de partezipaziun, n sentimënt de comprenjiun é de gran aiüt por chi che sint n gran pëis ados.
Degügn ne sá coche ara vá inant, degügn ne sá tan di che ara döra y coche ara ciarará avisa fora dedó. Chësc se dëida destaché le pinsier, ajache ponsé massa ne porta a nia. Al é na poscibilité da ascuté nosc sintí, da ti lascé lerch ala crëta che é te nos. Fá planns é por püch, por­chël tóchera da vire de por de, o dit miú: momënt por momënt. Y te vigni momënt podunse tó la dezijiun sce i orun ti lascé lerch al pëis, ala desperaziun y ala tëma, o sce i orun ti dé forza al positif te nos, ala crëta te nos y te nostes cualités y forzes.
Ala crëta tl bun, tl positif y ala crëta che – anfat desche ara jará fora – al sará döt bun.
Al é n tëmp de verité, ajache la verité se ciafa tres so tru. Les tëmes vëgn a löm. Sce ara se gareta él bun da ti lascé lerch ales tëmes, les sintí, les descrí y les capí por podëi les lascé ia.
Magari se garétera ince da ester reconescënc por la vita y por le bun che sozed sëgn incër nos ia, ajache la forza dla reconescënza é dër grana.  (de Angela Palfrader)