La Usc di Ladins

L é restà n muie sot al quorum del 40% l referendum propositif che proponea de empegnèr la Provinzia de Trent a regolamentèr la istituzion sun dut l teritorie agricol trentin de n raion biologich, metan en doura la scomenzadives legislatives e i provedimenc aministratives – tel respet de la competenzes nazionèles e europeènes – per portèr inant la coltivazion, l alevament, la trasformazion e la produzion de alimenc da la tera en maor mesura con sistemes biologics.

La proponeta aea ben segur ence elemenc che podea vegnir metui en discuscion, ampò l’aessa podù palesèr, te chisc tempes de alarm per l ambient, la sensibilità de la popolazion trentina, fajan entener che la jent ge tegn a sia sanità e a sia tera, e l’aessa podù vegnir aprijièda ence a livel turistich.

Amò apede aessa podù esser n pont de scomenz per mudèr la situazion atuala, olache ence chi che volessa fèr coltivazions biologiches i é penalisé dal fat de aer entornvia etres bachegn che enveze i spriza fora velens che pel ruèr ence sun chel di etres.

Ampò la consultazion é stata chiaramenter boicotèda a livel provinzièl, tant che l president de la Provinzia Maurizio Fugatti l indoman à sobito dit che no vegnarà fat nesciun raion biologich ajache i trentins no i lo vel. La informazion é stata dalbon schèrsa, e chest l é dassen schiet percheche la istituzions à spenù n muie de scioldi per nia e percheche a chesta vida la democrazia pert valor.

A livel provinzièl la perzentuèla la é stata del 15,58%, con l valor più aut a Cavizzana col 38,16% e en generèl te la Val de Sole, la soula a passèr via l 20%; Sporminore enveze l comun con l ejit mender, demò l 5,07%.

Te Fascia la perzentuèles de la jent che é jita a litèr les é amò sot a la media del Trentin. I litanc é stac  demò l 12,09% de chi che aea derit. 

De più, con duc i resultac comun per comun, é da lejer su La Usc stampèda de vender prum de otober.  (Lucia Gross)