La Usc di Ladins

L é endò ora de dombramenc per la mendranzes linguistiches e ence chest’outa l é vegnù fora la domana di nonejes che vegne recognosciù sia ladinità. Chesta rivendicazion à abù chesta setemènes passèdes l sostegn politich dal PD de la Val de Non e ence chel istituzionèl palesà dal assessor regionèl ai enc locai Lorenzo Ossanna.

»Desche assessor regionèl ai enc locai ge daré con convinzion mie sostegn a chi comuns de la Val de Non e de la Val de Sole che domanarà l recognosciment de la ladinità noneja«. Chesta la paroles de Ossanna a Novella, Comun olache enstadì l ombolt e la jonta i à aproà duc a una na mozion per ge domanèr a la Provinzia de Trent l recognosciment de partegnuda ladina, descheche aea jà fat de etres comuns nonejes desche Sfruz e Ville d’Anaunia e descheche à palesà la intenzion de fèr ence de autra aministrazions de la val del Noce.

Ma che segnificat e che emportanza èl, per i fascegn e per i nonejes, se declarèr ladins?
Aon sentù en cont de chest l conseier provinzièl ladin Luca Guglielmi e l procurador Giuseppe Detomas, che te sie percors politich l à abù n ruol emportant tel dessegnèr l sistem giuridich de stravardament di ladins de Fascia.

Podede lejer la posizion di doi raprejentanc istituzionèi de Fascia su La Usc stampèda de vender prum de otober.  (Lucia Gross)