La Usc di Ladins

L lurier di socoridores cogn amò jir inant sun Marmolèda, aldò de la condizions del temp, con jolieres e droni. Se spera de poder jir inant ence sul teren ti dis che vegn, ampò per la 13 persones no amò troèdes la speranza é beleche desfantèda. Diesc de la persones che mencia al apel les é taliènes e 3 de nazionalità ceca, e japede l giacé l é restà 16 auti, duc con targa foresta: una todescia, 2 ceca e una unghereisa e vegn amò chierì de troèr fora i patrons. L Socors alpin e speleologich à ativà n numer vert dedicà demò a la segnalazion da man de familiares o amisc de persones che é desvanides e podessa esser restèdes sor la giacia: l é l 0461 495272.

Ot l é enveze i ferii, porté ti ospedèi de Trent, Busan, Belun, Feltre e Treviso: doi de chisc i é en condizions grieves.

Per i socoridores l é stat e l é ores e dis de gran stress, fisich e emotif, e l develpai per sie prezious servije é stat uzà fora anché da duta l’autoritèdes.

Apede ai presidenc de la Provinzies de Trent e Busan, Fugatti e Kompatscher e al president de la Region Venet Zaia, domesdì, mingol entarvidà dal catif temp che no à permetù l sgol, l é ruà te Fascia ence l premier Draghi.

A la conferenza stampa te la caserma de protezion zivila de Cianacei Draghi e i presidenc à portà paroles de vejinanza per la families de la vitimes, de lauda e de sostegn per i operatores, de cruzie per la situazion ambientèla che domana dassen de mudèr endrez e entervegnir. N apel é stat uzà fora ence ai giornalisć, a la jent ruèda te Fascia e a chela che se palesa suoi social, de aer respet per chi che padesc e per chi che se dèsc ju per didèr.

L Capo del Departiment de Protezion Zivila Fabrizio Curcio à portà dant la informazions su la situazion de la enrescides, che à cognù lascèr per vèlch ora inant e domesdì a cajion del catif temp.
L pericol che se destache autres toc de giacia – un l é jà crodà – l é aut e l descomana i intervenc da tera per no meter a risech la vita di socoridores.

Etres provedimenc é stac touc te Fascia aldò de chesta desgrazia: i ombolc de duc i comuns a confin col giacé à manà fora la ordenanzes che descomana l azes a la Marmolèda per duta la jent.

L’azienda de Promozion Turistica de Fascia, ensema con duc i Comitac Manifestazions di paijes, à descancelà o sburlà duc i evenc che era stac programé enfin ai 6 de messèl, en segn de respet per la vitimes e sia families e per duc i tocé da chesta tragedia.

Apede chest l’APT de Fascia se à tout su l’encèria de coordenèr l’acolienza te hotie e cartieres che à desponibilità per ge dèr alberch ai parenc de la vitimes e de la persones che no é amò states troèdes e che é ruèdes te val. L é operatores turistics de val che à volù confermèr la desponibilità de la comunanza metan a la leta i posć desponiboi debant o a priesc rebassà. I enteressé pel scriver a infobooking@fassa.com o chiamèr l numer 0462 609600.

 (Lucia Gross)