La Usc di Ladins

»Al fiorir del soreie i monc se entenc de resa fort. L gran sas del Civetta, vindò da nos, somea na tiza che èrt. Chiò l é na pèsc soranaturèla. L ciel pien de steiles, la luna che se spieia te la neif, i ucie che cianta, l’èga che cor te ruf che li compagna, l’erba che parfuma, l’aria frescia e neta…. Dut zelebra la vita e la pèsc. E, enveze, sion te lesc de vera.«

Taca via coscita la piates del diarie de vera del tenent Gaetano Giardina de la Brigata Tevere che dal meis de mé del 1916 al meis de mé del 1917 é stata de postazion sun Sèn Pelegrin e l’à combatù contra i sudé austriacs sun Cimon de Boce. 

L é travers chesta piates che se dejouc l nef roman de Giovanni Grasso, scritor, giornalist e conseier per la stampa e la comunicazion del President de la Republica Sergio Mattarella, dal titol »Il segreto del tenente Giardina«, edizion Rizzoli.

La publicazion é stata prejentèda a Moena, te teater de Navalge olache l é ence la esposizion permanenta de la mostra su la Gran Vera, en mèrtesc ai 8 de aost, tel chèder de la rassegna Moena Incontri de la assessora a la cultura del Comun de Moena Cristina Donei. Te n dialogh anter Michele Simonetti Federspiel, curator de la mostra, e l scritor Giovanni Grasso, l gran publich te sala à podù cognoscer na storia del passà ambientèda sun nesc monc, che ponta via dai avenimenc de chi egn de vera e che encroja ite chela d’aldidanché de doi joegn...

Podede lejer dut su La Usc stampèda de vender ai 18 de aost.  (Monica Cigolla)