La Usc di Ladins

Ge dèr ousc a la femenes copèdes da omegn che aessa cognù les amèr, o amancol les respetèr. Femenes che no se à fidà domanèr aiut, che no é states e scutèdes, o che no à fat nience en temp a capir l pericol.

Ge dèr ousc a la eles che en vita no à abù ousc, l é stat la vida cernuda da la regista Michela Marangoni per soscedèr la reflescion e per sensibilisèr la comunanza en ocajionde la dì internazionèla contra la violenza su la femenes, con na performance dal titol »Copèdes te l’ènema«.

La regista à trat ca stories che Serena Dandini à scrit tel liber »Ferite a morte«, e dapò l’à chierì la eles fascènes che aessa podù lejer e interpretèr ogneuna de chesta stories.

A averjer l é stat Mirella Florian, che à rejonà de femenes che ‘no à stat ai pac’, o che ‘duc se spetèa che la fossa fenida coscita, ma nesciugn à fat nia’ per averjer la coltrines su na realtà che fèsc spaent.

Dapò l é stat l’outa de Lucia Kofler, tel guant de na ela manager: fin canche la é stata ‘manco’ che sie om imprenditor, la é jita ben, ma canche, zenza voler, la é ruèda più en aut, te el se à enscinuà na sort de velen, n ressentiment che lo à portà a la critichèr, deslomenèr, umilièr, chierir de descancelèr sia autostima a ogne maniera, fin canche chel cendrin che l ge à trat tel vis a descancelà ence sia vita.


De più su La Usc stampèda de vender al prum de dezember.  (Lucia Gross)