La Usc di Ladins

Desche duc sà, à la bandiera ladina ciafé ai 15 de mei 2024 sie reco­nesciment ofizial tl Consei regional, organ che à competenza y podei legislatif primar ence en cont de sconanza dla mendranza linguistica ladina.
Co che presidenta dla Union Generela éi audì con gran plajei chesta novela y i son demé contenta – y contenta é pa segur duta la po­pulazion ladina! – che al é finalmenter vegnù a se l dé chest vare dret em­portant per nosta mendranza. Do passa 100 agn da can che la bandiera ladina à svatoié per l prum iade sun jouf de Frara, fòvel ben gran ora che l simbol de identité y unité dla mendranza linguistica ladina dles valedes entourn l Sela ciapesse sia valuta y l dret reconesciment ence y souraldut da nostes istituzions che nes raprejenteia politicamenter.
La Union Generela di Ladins dla Dolomites ova dan avisa n ann, ai 12 de mei dl 2023, prejenté na deliberazion en cont dla »Regolamen­tazion dla esposizion dla bandiera ladina sun i frabicac publics ti Co­muns te chei che al viv la mendranza linguistica ladina«, aproveda al’una­nimité te sia radunanza generala. Chesta deli­­berazion, con na letra de acom­pagnament, fova vegnudes ortiedes ai 26 de mei dl 2023 al Presi­dent dla Region Autonoma dl Trentin–Sudtirol y al assessour regional a les mendranzes lingui­stiches da enlaouta y ence ciamò al president dla Lia di Comuns Ladins.

De plu tla edizion stampeda de La Usc di Ladins o sun l e-paper a paiament www.lausc.it/e-paper