La Usc di Ladins

Ai 25 e 26 de mé a Garmisch-Partenkirchen l é stat fat l 27° Alpenregionstreffen e ence noi Scizeres de Fascia aon tot part a chesta gran abinada che recorda noscia storia de partegnuda al raion storich tiroleis.

Con noscia Compagnia sion pontè demez da Fascia en sabeda e do 4 ore de viac sion ruè a Garmisch e se aon logà ju te n alberch de Oberammergau, na zitadina zis belota e da marevea con dute le ciase depente.

Da sera sion endò peè via per Garmisch per jir a veder l Zapfenstreich, che fossa l passaje del testamonech, de la Fahne de l’Alpenregion, da la Compagnia che l’aea endrezà l’Alpenregionstreffen l’oita dant, donca da la SK de San Martin in Passeier, a la Gebirgschützenkompanie de Garmisch. 

L era n grumon de jent che vardaa ajache l é na zerimonia n muie sentuda e de emozion. L piovan à benedì la bandiera, le Museghe à sonà e l é stat la defilada di Scizeres de la Compagnia de Garmisch che demò ic da soi i é de passa 100!

En domenia siane duc vertesc per la maor zerimonia de l’Alpenregion, e ence l ciel ne à donà na bela giornada de fin seren colma de sol. 

L é stat n spetacol veder duc i colores de chesta jent stolza de esser con soa mondura! Eraane de passa 10.000, Scizeres e Marcatenderes, mescedè int ai colores del pra pien de fiores col Zugspitze che ne vardaa da sora n ju.

Do l é peà via la defilada e per endrez del Major Andreas Kostner de Gherdena, che l se cruzia de le Compagnie di Scizeres de le val ladine, l é stat endrezà l bloch ladin. Donca Scizeres e Marcatenderes de Fascia, Gherdena, Badia, Fodom e Ampez à podù defilar duc ensema.

De più su La Usc stampèda de en vender ai 7 de jugn.  (Giana Sommavilla)