La Usc di Ladins

La é averta a 6 artisć, e de chisc doi ladins, la 6^ edizion del Simposie Toni Gross, che dal 2012, vigni 2 egn, viventea tel meis de setember l zenter de Poza con performance artistiches. Peà via tel segn più tradizionèl de la scultura, dal 2022 sot la direzion artistica de Pierangelo Giacomuzzi l event se à avert a la èrts performatives te si desvalives aspec e col tem »Surplus« l ge à dat l met a 4 cobies de artisć de se sproèr a declinèr anter scultura e musega i temes de ambient e antropocentrism, turism e ressorses di teritories.

Chest an l tem cernù l é »Vöit«, bela parola per ladin da Moena, e la endesfida l é chela de tor dant, travers l èrt e no demò, l conzet de ‘vet’ anchecondì sot desvalives aspec, ciapan input da na lingia de esperc te la materies scientifiches o te etres setores de la vita che, a na vida o l’autra, à a che fèr col ‘vet’. N rampeador, n fisich, n neurolinguist, n astronom portarà dant sie pont de veduda sun chest tem che ge permetarà ai artisć de meter en proa sia creatività.

Su la piata youtube de »Vöit« (www.youtube.com/@voit-2024) se pel jà veder i prumes video di esperc e duc i é envié a tor pèrt portan dant, ence da no esperc, sia idea de che che l é l vet.

I artisć partezipanc i vegnarà selezioné dai organisadores anter chi che portarà dant sia candidatura per la fin del meis de aost portan dant la proponetes che porta dant na vijion nia banala, luran a contat con la jent per didèr a fèr entener miec i conzec porté dant. Vegnarà vardà l leam col argoment, la descrizion chièra di conzec, l bon impat visif e l mender impat ambientèl.
I enteressé i pel portèr dant sia idea travers n curt video (max 3 menuc) e enjontèr a la domana i scric e dessegnes che i conscidra de utol.

De più su La Usc stampèda de en vender ai 9 de aost.


 (Lucia Gross)