La Usc di Ladins

Bele l prum de mei, la comunité da Fodom ava metù nte le mán de la Madona de la Nei, l davignì de la Gliejia, co na prozescion e n vesper solene ntel Santuar de La Court. N domënia passada, l Degán don Andrea Constantini a la fin de la S. Mëssa, l à perié con gaist che la Providenza ne mane n bon Paster, che mpruma de dut “l ie voie ben a Nost Signour”… e l Coro de Gliejia, delongo davò, à cianté a plena ousc “Christus Vincit: Tempora bona veniat…”. Spo è dezedù de partì, atiré da chëst rito misterious e scecolar, per tò pert a n event storich, co la consapevolëza de fè pert de ceze de gran e de universal. 

Ncuoi, miercoi ai 07 de mei del 2025, son mpermò rué nte la “Caput Mundi”, coche i la clamáva al temp del Imper Roman, per fè capì la mportánza che la zité ava nte dut l mond. E ncuoi, coche suzedù trope oute ntei scecoi, i ogli del mond ciala a Roma, a chël che suzede “Oltretevere”: la Gliejia l’é clamada a cerne fora n nuof Papa, n Paster che vise l miliardo e mez de catolizi che vif ntei cinch continenc de la tiera. 

Son chilò, “all’ombra del cupolone”, senté defora da na ostaria, davánt a nen bon café: l sorogle l é bele aut… vignitánt passa n cardinal, vestì con sua porpora, da sunsom fin japé. No i cugnësce, ma dessegur chisc i é “non elettori”: i 133 che da ncuoi davomesdì votarà nte la Sistina, i é bele duc daite dai mur de la Zité del Vatican.  Da le 10:00 tolarè pert a la zelebrazion “Pro Eligendo Romano Pontefice” nte la Basilica de Sán Piere, dita su dal Degán del Colegio Cardinalizio, S.E. Giovanni Battista Re: chëst l é l ultim moment ulache l popol pò pro ai cardinai. Da le 16:30 de ncuoi davomesdì, co na solene prozescion, duc i cardinai con mánco de 80 agn, i ruarà nte la Sistina e i se sentarà ju, vigniun nte sua luoga, sot al Giudize Universal de Michelangelo; nlouta vignarà prununzié l “Extra Omnes”, duc mossarà fora, i usc vignarà sarei co la cle e degugn savarà plu nia fin che dal ciamin no spontarà l fum: blánch o neigher? 

Vigni dì cater votazion, doi davántmesdì, doi davomesdì… fin che 89 cardinai (su 133) no i avarà scrit l medemo inom su la zetola bláncia che ie vignarà prejenté. Nte chël moment l Degán damanarà se l azeta la elezion a “Sommo Pontefice” e co ci inom che l volarà ester clamé. Dal ciamin de la Sistina se auzarà na gran fumada bláncia e l Cardinal Protodiacono l spontarà su la gran balconada de Sán Piere e l craiarà al mond: “Nuntio vobis gaudium magnum: habemus papam! Eminentissimum ac reverendissimum dominum.... Sanctae Romanae Ecclesiae Cardinalem…, qui sibi imposuit nomen ...”! 

La Gliejia avarà coscì l 267° sezescior de Sán Piere, clamé a visé l plu pico Stat del mond ma ence l plu gran e plu vegle “imper“ de la tiera: ma souraldut l Paster de cuajì n miliardo e mez de catolizi che vif nte duc cinch i continenc de la tiera. 

Ntra viere, divijion, capitalism e secolarizazion no l avarà nia de saurì, ma nos cristiagn speron che l abe l gaist e l coragio de testimonié con sua vita e con suo fè la gran Verité, per l ben de l’umanité ntiera. 

Denni Dorigo, da Roma per "La Usc di Ladins"