La Usc di Ladins

L é vegnù fora gana numer 29. La neva revista, dal titol ‘Dalonc empò davejin’, é stata prejentèda en vender ai 22 de mé te sala Danilo dal Garber te Ciasa de la Moniaria a Sèn Jan, tel chèder de la scomenzadives de l’Aisciuda Ladina. L domesdì, prejentà da Evelyn Bortolotti responsabola del Ofize Servijes linguistics e culturèi, é stat avert dai intervenc de la vizeprocuradora e conseiera de procura a la valiva oportunitèdes del Comun General de Fascia Lara Battisti e dal president de l’Union di Ladins de Fascia Fernando Brunel, che à portà l salut del president de la Union Generela di Ladins dla Dolomites Roland Verra. L é belapontin de gra al contribut del CGF, de la Intendenza e Cultura Ladina de la Provinzia de Busan e de la Union Generela che gana pel vegnir stampà e ruèr al publich ajache da desvalives egn la vegn data fora ensema a La Usc di Ladins.
La ganes del grop de redazion: Anna Mazzel, Lucia Gross, Olimpia Rasom e Ingrid Runggaldier se à dat ju ence chest’outa con gran gaissa e spirit ladin a meter ensema i scric, vardèr fora, regoer e tegnir i contac.
L domesdì é stat viventà da trei joena sonadores de chitara: Elena Trottner, Letizia Deluca e Virginia Baudin, studentes de la Scola de musega Il Pentagramma, che ensema con sia maestra Barbara Pedrotti les à slarià fora n gustegol snait da ganes.
Na seconda prejentazion de la revista de la eles ladines vegn fata a Ortijëi doman, jebia ai 28 de mé, te la Biblioteca Anda Malia da Cudan da les 6 da sera.

Podede lejer dut su La Usc dai 29 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Monica Cigolla)