La Usc di Ladins

Cun i 6 d’otober á metü man ofizialmënter la vijitaziun dl Vësco Ivo Muser tla Unité Pastorala Val Badia. Rodunt en chël de complî la Unité so cuarto ann de vita. Na bela coinzidënza. Metü man án cun na incuntada cun la popolaziun tla Ciasa Runcher a Badia, olache al é gnü traté trëi tematiches particolares: la domënia, la familia, l’acoliënza. Inant éra jüda la sabeda - tres a Badia, olache la Vësco á incunté i ploans danmisdé y i consëis de ploania domisdé. Da sëra spo la pröma mëssa prefestia te dlijia da La Ila, olache al é gnü tut sö te na manira cialda dala comunité. Le medemo él ince sozedü le de do a Badia, olache le Vësco á zelebré la gran mëssa. I ves pitun chiló n valgünes impresciuns fotografiches, rengrazian chi che nes á metü a desposiziun i retrac: Werner Pescosta, Freddy Planinschek y Lois Kastlunger.

T’La Usc di Ladins di 13 d’otober ciafëise deplü sön la sëra de daurida dla Vijita Pastorala a Badia.

Inant vára chësta sabeda ai 14, olache le vësco incunta a San Martin ombolc y aministradus de Comun. Dales 15.00 ales 16.30 sarál te salf dles manifestaziuns d’Al Plan na incuntada cun la jonëza. Dales 18:00 dij le Vësco la mëssa prefestia a Al Plan de Mareo y la domënia ai 15 dales 9.00 dijarál la gran mëssa a La Pli, paisc che pó chësc de ince festejé la segra.


 (pablo)