Manifestazions atuales speziales

Data

02 de dezember 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 02 de dezember 2022
»C + M + Balthasar«
L Museum Gherdëina nvieia ala cunferënza y giaurida dla mostra da Nadel 2022: »C + M + Balthasar. N Rë african tl’ert dl Medieve nchin al 20ejim secul«
L referat unirà teni dala storica dl’ert y tuadeura Jamila Moroder, tla sala scultures dl Museum Gherdëina a Urtijëi ai 6 de dezëmber dala 20:00. La cunferënza ie dedicheda ala rapre­sentazion dl rë african tla iconografia di Trëi Rëiesc, a scumencé da si prima prejënza tl’ert dl Medieve nchin a deventé na figura cunesciuda y populera sëura duta l’Europa.
Do la cunferënza uniràl mo fat na vijita meneda cun la referënta tres la mostra. Per l prim iede uniràl prejentà la pitura de n vedl autere di Trëi Rëiesc dla dlieja da Sacun, cunserveda mo n pert coche spuenda de n śessl de dlieja. La ntreda per la sëira ie debant. La mostra »C + M + B« sarà da udëi nchin ai 7 de jené dl 2023, da lunesc nchin sada, 14:00–18:00. Plu nfurmazions: www.museum gherdeina.it, tel. 0471 797554

Mostra »Nëif« – tla galaria Vijion
Tla Vijion Art Gallery veniel giaurì, ai 3 de dezëmber, dala 17:00, na mostra de ududes da d’inviern, che auza ora la faszinazion dla nëif
La nëif, cun si carateristica de archité y mujelé montes y crëps. Ai crëps blanc iel for unì lià valores y senificac desferënc, danter lijëndes y stories mitiches o misteriëuses, a n nchersciadum romantich nchin ala cuscienza moderna de ncuei­cundì. Tla mostra culetiva vëniel metù a lum opres d’ert, de 28 artisć:tes, fates dala prima metà dl ’900 nchin al didancuei. La mostra »Nëif« ne uël nia me festejé la belëza y marueia di crëps blanc, ma nce fé pensé do che la nëif ie nce na mesura y n spiedl dl cumpur­tamënt dla persona.
La mostra »Nëif« resterà davierta dai 3 de dezembër nchin ai 10 de jené dl 2023.
Orar dla mostra: lu–sa: 16- 19 (o cherdan su 3382098697)

Conzert d’Advënt
Le »Vocalensemble Alla Breve« tëgn conzert ai 4 de dezëmber a Badia
Badiamusica inviëia dër bel al conzert d’Advënt cun le »Vocal­­­ensemble Alla Breve« da Porsenú.
Al gnará porté dant musiga vedla de componisć dla Re­nais­sance, mo ince composiziuns plü modernes por cor.
Le conzert gnará tigní en domënia ai 4 de dezëmber dales 17:00, te dlijia a Badia.

Cunzert »Vienna Clarinet Connection«
I Jëuni de Mujiga Gherdëina nvieia al cunzert di Vienna Clarinet Connection, n mierculdi ai 07.12. dala 20:00 a Urtijëi te Cësa di Cungresc
Doi tlarinec, corn a bassëtt y tlarinet bas: cun chësta cunste­lazion unica pieta l Vienna Clarinet Connection na bela cum­pëida de sonns y n bon balanz danter ndividualità solistica y mujiga da camera. Nsci pieta Helmut Hödl (tlarinet), Rupert Fankhauser (tlarinet), Hubert Salmhofer (corn a bassëtt) y Wolfgang Kornberger (tlarinet bas) na simbiosa de mujiga metuda adum, mpareda ite y mpruvi­seda, cun elemënc de tlassica, jazz y pop y nce de mujiga d’al didancuei.

Emoziuns da Nadé tl’Alta Badia
Tratan le tëmp d’Advënt y da Nadé se trasformëia i paisc dl’Alta Badia te posć da na atmosfera particolarmënter sintida
Roda dles cripeles a La Val
A La Val gnarál metü a jí dal 01.12. ai 06.01. la Roda dles cripeles. Ara se trata de na roda fora por paisc, olache an podará amiré te de plü fraziuns cripeles de grandëzes desvalies. Implü sarál vigni vëndres y sabeda dales 18:00 inant l’Uniun dl Sport che dará fora val’ da bëre te plaza de comun, cina ai 24.12.
Atmosfera nadalina a Badia
Ince Badia slominará tl plü bel abelimënt da Nadé y al gnará metü sö na picera ciasota dlungia dlijia a San Linert, olache al gnará dé fora val’da bëre adöm ala Uniun di Ostis de Badia, la Jonëza da paur y i jogn dl paisc. Al ne manciará nia musiga dal vi; i apuntamënc é preodüs ai 2, 9 y 16 de dezëmber, dales 18:00 inant.
Nadé, musiga y tradiziun a San Ciascian
Dai 3 de dezëmber ai 7 de jená se trasformará le paisc da San Ciascian te na mostra alaleria, che cunta y spliga les tradiziuns ladines tratan le tëmp d’Advënt y da Nadé; lapró gnarál metü fora de plü cripeles fates a man da artejans dl post. Dales 16:00 ales 19:00 podarán s’la spaziré fora por paisc y descurí sön les tofles metüdes fora les usanzes ladines, sciöche ince sgolosé val’ duciaria y se bëre val’ de cialt pro les üties abelides da Nadé. Val’ sëra sarál ince grups dl post che porta dant musiga y cianties d’Advënt y da Nadé.
Marcé da Nadé a Corvara
Ince a Corvara gnarál indô metü a jí le marcé da Nadé cun de plü parte­zipanc che dá fora val’ da bëre y da mangé, sciöche ince produc dl post y de artejanat. Le marcé gnará metü a jí dai 3 ai 11 y dai 16 ai 18 de dezëmber, sciöche ince sura Nadé dai 22.12. ai 06.01., tres dales 16:00 ales 19:00. Te de plü ocajiuns gnarál metü a jí intratignimënt musical y apuntamënc speziai.
Magia dl Nadé a Calfosch
La plaza de dlijia a Calfosch i fajará da cornisc ai apuntamënc »Magia dl Nadé«, plü avisa ai 5 y 20 de dezëmber y ai 3 de jená. Te chëstes ocajiuns gnarál dé fora dales 16:30 ales 18:30 val’ duciaria y boandes cialdes y an podará ascuté sö les plü beles melodies dl Nadé cun musiga dal vi, y ince ti ciaré ales cripeles fates a man dai artejans dl post, che gnará metüdes fora cina ai 10 de jená.

Proiet: i popui de nostes munts
En sabeda ai 10 de dezëmber vëgnel presenté a San Martin i resultac de n proiet Interreg sön i pröms abitanc preistorics de nüsc raiuns
Le proiet é gnü a s’al dé tres n Interreg Talia – Austria y porta le titul »I pröms abitanc preistorics dl Osttirol, dles valades ladines y dla pert ladina dles Dolomites belu­nejes«. En sabeda ai 10 de dezëmber dales 15:00 gnarál presenté tl salf dl Istitut Ladin a San Martin de Tor i resultac che é gnüs fora. Impröma gnarál cunté dles analises archeologiches sön les chertes interatives di sîc mesolitics, dedô gnarál proieté le film de Paolo Vinati »Les munts cunta«. La manife­staziun vá a piz cun n renfrësch.

Galaria retrac