La Usc di Ladins

Proieziun: »Islanda d’isté«
Le Fotoclub Val Badia inviëia en jöbia ai 11 d’aurí a na proieziun de fotografies cun Hubert Hilscher, che mostrará impresciuns demorvëia dal’Islanda
»Islanda d’isté« é le titul dla pro­ieziun de fotografies che le Foto­club Val Badia mët a jí en jöbia ai 11 d’aurí dales 20:30, tl salf dl Istitut Ladin a San Martin de Tor. Protagonist é le fotograf Hubert Hilscher da Niederdorf, che mostrará impresciuns da na tera straordinara. Al dij instës che »al é na morvëia, tan de fassëtes che la natöra dl’Islanda á striné ada­lerch. Füch y dlacia é i elemënc che dá forma. Dlacia y vulcanism carate­risëia la contrada. L’Islanda dá na idea de tan salvaria y autentica che la natöra pó ester.« Le Fotoclub se conforta da ves saludé.


»Fitnesslandia« a La Ila
La Uniun Sport La Ila mët a jí d’aurí de plü cursc por gragn y pici
Tl mëis d’aurí mët man »Fitnesslandia – aisciöda 2024« – cun cursc organisá dala US La Ila.

• Acqua fitness por gragn: jöbia
  • 
  •  

  View the embedded image gallery online at:
  https://www.lausc.it/manifestazions-y-evenc/26798-manifestazions-atuales-speziales#sigProId8185b3bf48
  ai 11 d’aurí dales 19:00 tla nodadoia comunala da La Ila. Indöt 7 iadi, al cost de 90,00€. Referënta é Giulia Barp.
• Nodé por mituns dla scolina y elementara: mercui ai 10 d’aurí dales 13:45, tla noda­doia da La Ila. Indöt 7 iadi a 90,00€. Referënta é Giulia Barp.
• Ginastica 50+: lönesc ai 15 d’aurí dales 17:00 te palestra dla mesana da La Ila. Indöt 7 iadi a 70,00€ (iscriziuns le pröm iade söl post). Referënta é Jazmine Ceballos.
• Curs de autodefenüda por jonins/es: mercui ai 3 d’aurí dales 15:00 (scora mesana) y dales 16:00 (scora alta), te palestra da La Ila. Indöt 6 iadi a 70,00€. Referënt é Luigi Belloto.
• Curs de autodefenüda por gragn: mercui ai 3 d’aurí dales 19:00, te palestra da La Ila. Indöt 6 iadi a 70,00€. Referënt é Luigi Belloto.
• Karate sportif por mituns dla elementara: mercui ai 3 d’aurí dales 17:00, te palestra da La Ila. Indöt 6 iadi a 70,00€. Referënt é Luigi Belloto.
• Curs de roller (atrezatöra vëgn imprestada fora y é tl prisc): lönesc ai 8 d’aurí dales 14:00, te palestra da La Ila. Indöt 4 iadi a 60,00€. Referënt é Roberto Sasso.

Iscriziuns online y infos sön www.uslaila.it – infos y assistënza fitness@uslaila.it–Por tó pert ai cursc mësson ince paié ite la cuota de comembranza tla uniun.


Pici bocuns
N curs cun Simon Valentini, olache jones y jogn pó imparé da arjigné ca de pici bocuns y boandes
Oste arjigné ca n aperitif mo te ne sas nia co mëte man? En vëndres ai 12 d’aurí dales 17:00 ales 20:00 vëgnel metü a jí tl Saj.un a La Ila n curs cun Simon Valentini. Te chësc domisdé, olache al gnará arjigné ca de pici bocuns y boandes, ciafaraste dër dessigü val’ bona rezeta da tó ca te chëstes ocajiuns.
Les iscriziuns, dai 16 agn insö, é da fá anter i 9 d’aurí pro vanessa@jogn.org o al 345 371 7729. Organi­saziun: Consëi de Formaziun Badia y Sorvisc ai Jogn Val Badia.


Festa dla Loca cun Panda la 9
N sada ai 6 d’auril mët l Freeride Club Gherdëina inò a jì l »Lockenfest« sun Plan de Gralba y plu avisa pra l lift Pudra. N scumencerà dala 11
L ie na manifestazion drët particulera ulache i parte­zipanc y la partezipantes cëla de passé via a vel’ maniera la loca, n busc giavà ora tla nëif y mplenì d’ega. L fin ie chël de festejé debe­rieda cun duc i pasciunei y la pasciunedes la fin dla sajon da d’inviern y l sarà sambën nce da maië y da bever per duc. Mujiga dal vif cun Andeep, DJ Ondy y sambën da ne s’arjumé nia Panda la 9!
La festa scumëncia dala 11 cun »Frühshoppen«!


Cunzert da d’ansciuda
La Mujiga de Urtijëi nvieia a si cunzert tradiziunel da d’ansciuda, n dumënia ai 7 de auril dala 10:30 tla Cësa di Cungresc a Urtijëi
Tla prima pert dl cunzert uniràl sunà cumposizions tlassiches, coche l »Spanischer Marsch« de J. Strauss Sohn, »Das Land des Lächelns« de Franz Lehár, l conzert per oboe de Vincenzo Bellini cun la solista Nadia Kasslatter y »Höhenflieger« de Gerhard Lampert. La jirà inant pona cun mujiga plu moderna: »Hawaii Five–O« de Stevens Marten y »Love Theme Cinema Paradiso« de Ennio Morricone. Inant vàla pona cun »Caribbean Hideaway« de James Barnes y per stlù ju cun »So schön ist Blasmusik« de Erich Becht. La Mujiga de Urtijëi se ncunforta sun Vosc unì y mbincia n bon scuté su.


»C’è carta bianca« - mostra nterativa
La giaurida ie n sada ai 6 de auril dala 17:30 tla sala dla Lia Mostra d’Ert a Urtijëi
L nvit ie chël de fé pea: la lerch ie davierta a duc y dutes, artisć:tes o nia, per­sones singules, grupes o families. N scumëncia cun n mur curì cun papier blanch che, coche n liber zënza pustomes, reprejënta l uet y la monotonia, ma nce la puscibltà de se tra­sfurmé te n’opra d’ert. I mures sarà la lerch per vosta esprescion criativa y sarà a despusizion per duta la dureda dla mostra. I pensie­res, la storia persunela y l carater de uni partezipant:a nfluenzeia l resultat finel, trasfurman la mostra te na performance. Uniun:a ie liedia de crì ora si maniera de esprescion. I materiai vën metui a despusizion, ma n possa nce tò pea nstësc zeche. La mostra resterà davierta nchin ai 13 de auril, uni di, 16:00 – 19:00 y de sada y dumënia dala 10:00 – 12:00.
Per estejé la giaurida vëniel metù a jì na sëira cun skate y mujiga. Dala 20:00 inant se ndesfiderà i skaters te n pitl contest. Sëuraprò saràl velch da maië y da bever y mujiga punk rock.


»Calígula« – ince en Lönesc de Pasca
Le Stadttheater a Bornech presentëia inant le teater »Calígula« desco contribut de teater ladin profescionistich dl proiet europeich »phōnē – giving minority languages a voice«. Les rapresentaziuns é ciamó: en Lönesc de Pasca dales 18:00, y spo ai 4 y 6 d’aurí 2024 dales 20:00
Uma, pere, möta y sëgn ince n vicel: Calígula! I trëi mëmbri dla familia ne ascuta nia pro un y l’atra, düc é cruziá por se instësc y descür püch y nia de sü sentimënc. Cun le tëmp tol ite Calígula tres plü lerch te chësc tiesciü, al asmata parores y frases, se recorda i baiá y les cuntejes, se ghira l’atenziun. Indechëltan sál di familiars deplü co chisc de un y l’atra. Le ritm dla cuotidianeité mët man da se desfanté. Les falzades se sfrogherëia sö. Düc brancia do süa liberté, ince Calígula. Che la ciafará pa? Éra pa davëi inzai?
Al é n toch de teater ladin des­biech, mo al vëgn ince dant te val’ pert le todësch, söl ester liá y sará ia te costruc y realtés, y söla doman­da sce al é bëgn poscibilités da i sciam­pé. Pó pa magari l’inteligënza emo­zionala daidé? O chëra artifiziala?
Idea y libreto: Iaco Rigo, regia: Viktoria Obermarzoner; cun Hanenn Huber, Lisa Laner, Sabrina Frater­nali y Mirko Costa, aredamënt y costüms de Ursuala Tavella, musiga de Maria Craffonara, al bala Sabrina Fraternali.
Rapresentaziuns él söl program ciamó en Lönesc de Pasca al 1. d’aurí (dales 18:00), y ai 4 y 6 d’aurí (trami iadi dales 20:00).
Les chertes pó gní resser­vades söl portal https://stadttheater.eu/


»La Giatiscima« a La Ila
L’Uniun Sport La Ila cun les Scores de Schi da La Ila y Dolomites inviëia düc chi da La Ila a »La Giatiscima 2024«, en sabeda ai 6 de aurí
La gara dl paisc da La Ila mët man cun l’incun­tada di concorënc cun les pels, dales 7:30. Dedô vára inant cun la gara de schi, che mët man dales 9:30. Intrames é sön la pista de Gardenacia.
Do la gara é düc i scric ite inviá tla Ütia Florian a marëna y ala premiaziun. Les iscri­ziuns vëgn tutes sö pro la Scora de Schi da La Ila al 0471 847258, cina en jöbia ai 4 de aurí anter les 17:00.
Informaziuns plü menüdes ciafon ince sot ala plata inter­net www.uslaila.it


Infopoint Informatica
Le Consëi de Formaziun Badia mët a jí de plü incuntades por dötes y düc chi che á domandes incër computer y smartphone
Les incuntades de »Infopoint Informatica« é ponsades por daidé dötes y düc chi che á domandes che reverda l’adoranza de computer y smartphone: Co scrí na e-mail? Co fá n pü’ de lerch sön le smartphone? Ci é pa le SPID y co pón pa le fá?
Chëstes y tröpes d’atres domandes podará gní portades dant. Le sorvisc é debann y vëgn pité chisc dis:

• jöbia 04.04. dales 15:00 ales 17:00 te biblioteca a La Ila
• jöbia 18.04. dales 15:00 ales 17:00 te biblioteca a La Ila
• mertesc 30.04. dales 15:00 ales 17:00 te biblioteca a Badia
• mercui 08.05. dales 9:00 ales 11:00 te biblioteca a La Ila

Referënta é Maddalena Valentini, l’organisaziun é dl Consëi de Formaziun de Badia.