La Usc di Ladins

Bon di Valeria, ci posto ne conté de ti?
Valeria: Vive nta Fodom, ma son da La Rocia e è 37 agn. M’è laureé a Udine n Conservazione dei Beni Culturali col indiriz archivistich-librar, che l à propio a ci fè col laour che son drio a fè ades, al Ciastel d’Andrac: ades l é debota doi meisc che son cassù e me sà tánt bel conté a la jent la storia e ci che l é suzedù chilò.

E chësta jent che ven al Ciastel, vegnela percieche l’é nteresciada o ruela per cajo?
Troc i no cugnësc nia, magari i fesc la vijita co l’audioguida e a la fin i disc che i é restei tan’ contenc e che fossa da fè plu promozion; po l é ence chi che no vol jì ite percieche, per dëi, siech euro per l bilieto i é »massa”, cánche da autre pert l é luoc ulache se paia trop de plu per vedei tánt de manco. Al Ciastel l bilieto l valëssa ence demè per rué fin sunsom a se cialé l panorama dintourvia. E po l é dut l rest che i pò ciapé ntei self del Ciastel. Nos ie fajon ence la vijita debann, che la dura n’ora, siebelo n grop da vint persone che da doi. Me per che, per l turism che on cassù da nos, la pert culturala daspës la resta n frëgo davò via, con jent che và a spëne caránta euro per monté su nen lift senza ie pensé su doi oute ma che no vol trè fora siech euro per vijité n ciastel. L é ence sciode che troc de fodomi i pensa che vegne spenus massa scioldi per l Ciastel: poester che avei tres bù velch da de tel pro cesa l no mpermët de se rende cont del valour che l pò avei… (Intervista de Martino Pezzei)

De plu tla edizion stampeda de La Usc di Ladins o sun l e-paper a paiament www.lausc.it/e-paper