La Usc di Ladins

Lara, posses’a te prejenté n curt?
Son Lara Prinoth, é vintcater ani y son de Urtijëi. Ie lëure coche nfermiera tl spedel de Persenon da jené incà.

Ciunes ie pa ti pascions?
Bele da pitla insù éi for abù na gran pascion per la mujiga. É sunà per truep ani l tlavier tla scola de mujiga de Urtijëi. Daldò sons jita pra la grupa de mujiga »Helios« a suné l tlavier y plu tert éi scumencià a cianté tla grupa. L me sà mpue sciot che ne sone nia plu tan suvënz l tlavier. Messësse propi inò tò ca y suné unitant; l me savëssa sciot a me desmincë coche l va. Zeche che me sà ënghe scialdi bel ie jì a crëp. Vede dantaldut gën tla pale­­stra d’arpizeda a Persenon ulache n possa sibe jì a bouldern che a crëp cun la corda. Vede nce gën sa mont, ulache me sà da stramp bel a ti cialé ala natura y ai crëps.

Te ies bele stata scialdi ncantëur. Ciuni fova pa ti viages plu biei?
Un de mi viages plu biei y che me lecurderé per for ie l viac tla Namibia cun mi familia. L fova n viac scialdi particuler y cun truep da udëi. Tl desert éi pudù udëi truep tieres nteressanc y é pudù mparé scialdi dla cultura da iló. N auter viac che me à sapù scialdi bel fova l viac tla Thailandia y tl Vietnam cun na cumpania. La vita y la cultura tl’Asia ie scialdi autramënter y dassënn nteressanta. L ann passà son jita per n mëns a Bali tl’Indo­nesia, ulache é judà pea pra n proiet soziel. Ti é nsenià nglëisc ai pitli mutons dla scolina. Pënse mo suvënz a ëi; ëi me à propi dat pea scialdi. Si maniera de vester senzieres y de vester tan cuntënc cun puech ie zeche che nëus pudon se cialé ju dassënn. (Sofia Kostner)

De plu tla edizion stampeda de La Usc di Ladins o sun l e-paper a paiament www.lausc.it/e-paper