La Usc di Ladins

Pra l gran turnoi nternaziunel de tennis di ëi se à l jëunn de Gherdëina Patric Prinoth mustrà da si miëura pert.
Venciù à mpo Jay Clarke, ala fin dla partida de tabelon prinzipel de n lunesc ai 16 de nuvëmber, che à durà passa doi ëura, ma Patric Prinoth à for tenì pea. L ne fova nia dalonc dala gran surpreja. Bonamënter à Prinoth mustrà si miëur match de duta si cariera. Clarke, numer 187 dl mond, à venciù per 6:3, 6:7 (9) y 6:3.
L prim set à Patric perdù do n break tl cuarto game. Tl segondo set fòvel dut ntëur a livel cun Clarke, o mo miec, l ie stat miëur, vencian l set tl tiebreak. Tlo ie l jëunn de Gherdëina stat bon n iede de ti vester a trëi codles dl match, per fé pona ël l pont per l set.
Tl terzo set ti iel a Patric riesc garatà n break, l ova pona doi codles per l 2 a 0, ma danz che l se à pona giapà l re-break, y mo n break tl otavo game.
La pudova jì – mo – miec, ma mpo: cumplimënc de cuer a Patric!

N merdi ai 17 de nuvëmber vàla inant cun la partides danmesdì; domesdì (nia dan la cater), se anconta l young-star Lorenzo Musetti cun Roberto Marcora.
Da dedò iel la partida de dopl cun i matadores raionei Patric Prinoth y Erwin Tröbinger, che purverà a ti vester a Jamie Cerretani di USA y l svizer Luca Margaroli.


David Lardschneider

FOTO: Patric Prinoth.