La Usc di Ladins

Pra l gran turnoi nternaziunel de tennis di ëi a Runcadic à i doi jëuni de Gherdëina Patric Prinoth y Erwin Tröbinger tenì pea tl dopl, nce sce i à ala fin perdù. Prinoth à fat l di dant na gran partida de singul. N vënderdi ai 20 de nuvëmber i cherc de finela, n sada ai 21 la finela de dopl y la semifineles dl singul, n dumënia ai 22 de nuvëmber la finela dl singul
L prim set dla partida de n merdi sëira à i doi jëuni de Gherdëina Erwin Tröbinger y Patric Prinoth iusta perdù tl tiebreak contra l pèr Jamie Cerretani di USA y l svizer Luca Margaroli. Tl segondo set ti iel garatà n break, sun l 5 a 4 ova i doi de Gherdëina monce la codla set. Danz che la ne n’ie nia jita fata y nscila à i averseres valivà ora sun l 5 a 5, per jì pona a vëncer nce l segondo set per 5 a 7 y nscila la partida.
Patric y Erwin à perdù, ma cun denità. I à mustrà n tennis ufensif, purvan for a fé i ponc y respundan nce sun la batudes di autri te na maniera ndrëta, zënza jì sun la defensiva. L trainadëur Stefano Bassetto à tlo dessegur si merit, per coche l à njenià ca »si« atlec.
N vënderdi ai 20 de nuvëmber iel dala 10.00 inant cater partides de singul, cherc de finela y doves de dopl per la semifinela. N sada ai 21 de nuvëmber iel dala 11.00 inant la doi partides de semifinela tl singul y la finela dl dopl, la secuënza ne sàn danora nia, ajache l vën for a dì sce zachei muessa fé sibe una che l’autra partida. La finela dl singul ie pona n dumënia ai 22 de nuvëmber dala 11.00 inant.

David Lardschneider

FOTO: I doi jëuni de Gherdëina che à fat pea pra l dopl: Patric Prinoth, a man ciancia, y Erwin Tröbinger (foto: Roland Strimmer).