La Usc di Ladins

L’é stat na bela dì de sport e legreza sa mont sun Contrin en domenia ai 29 de aost per la edizion numer 44 del Trofeo Contrin.

De zirca 60 i é rué sù coran fin al 2016 metres del Refuge, dò esser peé via da Dèlba da les 10 da doman e esser jic su l’ert per zirca 6 chilometres e beleche 600 metres de dislivel.

A fèr dut l percors tel temp mender de 29’44”, l soul a restèr sot la seida de la mesora, l’é stat l’oramai cognosciù atlet da Vich Mauro Rasom, clas 1992, che l’à stat beleche 4 menuc de manco che l conscrit e amich Damiano Nicolodi da Cianacei (33’26”), secondo te la categoria Senior. Anter ic se à logà Federico Dainese, clas 1982 da Como, che é ruà prum di Amatores te 33’13” e pech dò, te 34’18” l’é ruà al travert Alessandro Vuerich, clas 1962 e prum di Pionieres.

Ma a soscedèr la maor marevea l’é stat i più joegn, con n muie de bec che à tout pèrt e che à fat de bogn tempes, e amò de più la bezes: defat sul podie l’é ruà ence na picola de 3 egn e mez.

De più su La Usc stampèda de vender ai 3 de setember.  (Lucia Gross)