La Usc di Ladins

La era perveduda per en mercol ai 12 de jené e la é stata sburlèda de na dì a cajon del gran vent, la pruma de cater garejèdes de Copa Europa en program sui monc franzousc de Orcieres-Merlette.

La pruma en jebia ai 13 la ge à portà ben a la atletes de Fascia, col terzo post per Monica Zanoner da Ciampedel e secondo post per Alice Robinson che oramai da egn à sia seconda cèsa a Soraga e la se arcedea sui portoes fascegn. Dedant a la neozelandeisa clasc 2001, che era pruma te la pruma manche, l é ruà con 0”33 de vantac demò la svizra Juliana Suter, che aea vent ence ai 21 de dezember sun Sèn Pelegrin. Apontin de dezember su La VolatA la joena fascèna de 22 egn che cor per i colores del C.S. Esercito se aea metù al luster ruan te la Top Ten. 

Te la Franzia l é ruà sie prum podie en Copa Europa, a 69 centeisemes da la Suter, do che te la proes del mèrtesc la era stata bona de ruèr ence sul secondo sciaier. Bon ejit per la squadra talièna ence con Verena Gasslitter, che se à vadagnà la 5^ posizion, pecià enveze per l’autra ladina Teresa Runggaldier da Selva che no la é ruèda al travert. Speron de aer neves autertant bones ti dis che vegn.  (Lucia Gross)