La Alps al via, l é scomenzà l campionat de la squadres ladines

Data

30 de setember 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ampez, Fascia e Gherdena ence chest an te l’AHL. Cruzies del hockey per la boletes eletriches.


Na neva sajon de Alps Hockey League é scomenzèda. L era i 10 de setember canche la formazions se trajea ite i feres per jièr la pruma partida ofizièla del nef campionat 2022/2023. Da enlouta ve aon contà neves da Gherdena e Ampez, anché ve dajon agiornamenc da Fascia e sessaben seghitaron a ve dir dut sun noscia squadres ladines via per l an chiò su La Usc.

La squadres che fèsc pèrt del campionat de chest an les é 15. Anter chestes la neopromossa Unterland, l Renon, l Vipiteno, l Maran e noscia trei ladines che tegnarà aut l onor del hockey talian. Recordon che enveze l Asiago à dezidù de se enscinuèr al campionat de IceHL dessema a Busan e Pusteria. Sarà dapodò l Jesenice a raprejentèr la Slovenia e na maor pèrt de squadres austriaches: Zell am See, Kitzbühel, Salzburg, Bregenzerwald, Klagenfurt, Lustenau e Linz.

Desche semper la sajon se spartesc anter na regular season che dezidarà na classifica de la forzes su la giacia e na seconda pèrt de sajon, più emportanta e dezisiva, con i playoff per venjer l campionat. Sarà seguramenter na sajon da emozions che duc i pascioné spera de poder viver fin junfon. Gran cruzie anter la sozietèdes l é per i cosć del eletrich, che met en dificoltà la gestion di stadies. Desvaliva realtèdes à palesà malsegureza e risech de cogner serèr i impianc per la boletes cères, ence lesc de gran tradizion: l Alleghe à anunzià che col 1 de otober l Alvise de Toni serarà i ujes per na gestion oramai empossibola.

De più sui prumes ejic del campionat su La Usc stampèda de vender ai 30 de setember.  (Daniele Verra)