La Usc di Ladins

En sabeda y en domënia él sté a Lenzerheide, tla Svizera, le »Dreiändervergleich«, gara de biathlon olache al röia adöm i mius atlec y les mius atletes dl raiun alpin todësch, tanco dl Paiern, dl Tirol y dl Südtirol. De gran sodesfaziuns él garaté por i ladins, dla Val Badia y de Gherdëna, che á tut pert, se portan a ciasa deplü medaies, danterlater ince döes d'or. Öna na medaia d'or é gnüda davagnada, tla categoria S15 (classa 2008) da Anna Anvidalfarëi dl Schiclub Gherdëina. Medaia d'or ince por Rafael Tavella dl SCA Alta Badia Nordic tla categoria S13 (classa 2010). Tla medema categoria á le gheredëna Manuel Anvidalfarëi arjunt le terzo post, davagnan la medaia de brom. Ince le de do ti él garaté a Manuel da rové sön le podest, tres al terzo post. La domënia é Rafael arsí al 11. post. Giovanni Gnesotto dl SCA Alta Badia Nordic (cat. S13 – 2010) s'á plazé al 4. post la sabeda y al sesto post la domënia. Cuarto post ince por Lena Kostner da Gherdëna, (cat. S12 – 2011), che s'á spo plazé la domënia al sesto post. Tla medema categoria é so compagn de scuadra Daniel Perathoner rové 10. la sabeda y 9. la domënia. Dl SCA Alta Badia Nordic é Loris Costabiei rové 7. la sabeda, la domënia s'ál plazé al 3. post davagnan la medaia de brom. Tla categoria S14 (classa 2009) é Elsa Canins rovada al 5. y al 6. post. N 12. y n 4. plazamënt é gnü arjunt da Verena Pallua y Sofie Irsara é rovada 10. la sabeda y 8. la domënia. Mattia Runggaldier dl Schiclub Gherdëina é rové tramidui i dis al 17. post y Lia Bertoldi, che á garejé tla categoria S13 s'á plazé la sabeda al 12. post y la domënia al 10.  (kp)