La Usc di Ladins

En mercol ai 15 de mèrz l é stat n dì storich per la brea talièna. A Rogla te la Slovenia tel slalom lèrch paralel de Copa del Mond duc trei i sciaieres del podie é stac defat vadagné da atlec de la squadra nazionèla vidèda da Cesare Pisoni. L prum post é stat arjont da Roland Fischnaller, secondo l é ruà l fascian Mirko Felicetti e terzo Edwin Coratti. 

Per l atlet moenat da Someda, che l à 30 egn e l cor col Circolo Canottieri Aniene, chest l é stat l diejem podie de Copa del Mond de sia carera e l secondo te chesta sajon do l arjent vadagnà ti Grijons a Scuol ai 14 de jené.  

L é da dir che Fischnaller e Felicetti i se à troà a n confront dret dassen batalià te la big final de Rogla, olache l fascian era do a tegnir ben l pas, ma l é slizià sfrean per n trat col comedon su la neif; enceben l temp prezious perdù l é ruà demò 22 centeisemes do dal compagn de Sudtirol. 

Coratti à vent sul fil di centeisemes te la small final contra l sudcorean Shango Lee, enveze Daniele Bagozza, atlet de 27 egn de le Fiamme Oro da Ortijei, se à fermà ai otaves, desche i etres taliegn Gabriel Messner, Maurizio Bormiolini e Aaron March.

De più su La Usc stampèda de vender ai 24 de mèrz.  (Lucia Gross)