La Usc di Ladins

Se à giusta serà su a Rogla l slalom lèrch paralel de Copa del Mond de brea, olache i atlec de la squadra talièna se à fat gran onor. Duc à passà la calificazions e l ladin de Gherdena Daniele Bagozza, con te gofa la medaes de arjent e de or vadagnèdes te la ultimes setemènes, parea l favorì col secondo mior temp; do da el l era Edwin Coratti (5°), l ladin da Moena Mirko Felicetti (7°), e dapò Aaron March (8°) e Maurizio Bormolini (9°).

I chèrc de fonèla à metù de contra proprio i doi ladins, con Felicetti che l é stat bon de aer la soramessa su Bagozza. ruà en ultima al 6° post tedo dal corean Sangho Lee. 

Te la semifinèles Felicetti se à troà de contra l austriach Benjamin Karl, che l é stat bon de bater l fascian. En ultima te la finèla per 3° e 4° post Felicetti, enceben n fal a mesa gara, l à abù la venta sun Edwin Coratti per 8 centeisemes e l se à vadagnà coscita l podie: sie prum podie de chesta sajon e l undejeisem en cariera.

Te la gran finèla Benjamin Karl per n sofie l é stat mior che l auter atlet talian, Aaron March, che l aea batù Bormolini ti otaves e l à coscita concostà la medaa de arjent.

No la é jita autertant ben per la eles: la venta é jita a la giaponeisa Tsubaki Miki dedant a la olandeisa Michelle Dekker e a l’austriaca Sabine Schöffmann; Jasmin Coratti la se à fermà a la diejema posizion e Lucia Dalmasso, cresciuda sportivamenter te fascia, la é jita fora ai otaves contra la todescia Ramona Hofmeister e l’à fenì 14^.

Jà en sabeda l é en program n auter apuntament col slalom paralel a Simonhöhe, te l’Austria.  (Lucia Gross)