La Usc di Ladins

I à betù poco, una śornada, par desfei el padeon de ra musica, in piaza Angelo Dibona, sote el cian­panin de Anpezo, inze ‘l cuore de ‘l paes, agnó che ra comunità se ciata, canche ‘l é algo, da stà dute aduna. I betarà nafré depì a fei su chel noo, duto el mes de śugno, ma de luio se podarà vede ra cogoia noa, de len e de ran. I mudarà anche ‘l inpianto da ra tirà su, da ra fei vegnì fora da sote tera. L ea biśoin de fei sto laoro, dapò de cuaranta ane. Chel padeon ‘l é stà fato del 1984, da ra Banda de Anpezo, con el presidente de inalora Osvaldo Majoni Boto, d’acordo con el Comun de Anpezo, con el capocomun Domenico Tellarini. L ea nasciù pacé che ra Banda r’aea biśoin de un luó, agnó sonà. Inze piaza no se podea fei su algo de fis, che stajea senpre, parcé che ra Sovrintendenza no vorea. Coscita i s’à pensà de fei algo de scondù, che vegnia fora canche ‘l ea biśoin. (MDM)

De plu tla edizion stampeda de La Usc di Ladins o sun l e-paper a paiament www.lausc.it/e-paper