La Usc di Ladins

Dò i dis de Ujes averc a la Scola de Fascia, te la sala de la Sorastanza a Sèn Jan l’é stat la zerimonia de consegna di diplomes ai 59 studenc di trei licei de la Scola de Fascia, Artistich, di Lengac e Scientifich, che à serà sù sie percors de studies te l’an de scola 2018/19.

L domesdì, portà dant con braùra e segureza da Mattia Valentini, student de terza del liceo scientifich, l’é tacà coi joegn del projet »Cianton da marevea« che à ciantà sot la vida de la maestra Samantha Pederiva, compagné con la chitara da Alex Pederiva e Filippo Chiocchetti e che se à enterzà coi desvalives momenc de la zerimonia.

La sorastanta Mirella Florian, che à volù meter a jir ence te noscia scola chest moment de recognoscenza ofizièl a la fin de la scola auta, l’à saludà duta l’autoritèdes, ma soraldut i protagonisć de l’event, i studenc e sia families, i ensegnanc e dut l personal de la scola.

La festa de la consegna di diplomes – l’à dit la Sorastanta - l’é na festa de la comunità percheche l travert arjont da chesta bezes e chisc bec cogn esser motif de orgolie per duc noi. L’à sotrissà la funzion strategica di genitores che à semper sostegnù si fies i engaissan a no se destrameter tedant a la dificoltèdes.

Dò se aer augurà che la scola sie stata bona de portèr a compiment sia finalità prinzipala, l’à ge à fat ai neo diplomé i più bie e sinzieres augures per l scomenz de sia neva aventura. Voi ve far na racomanazion – l’à fenì fora – no ve encontentà, voi per voi cognede voler l miec!


 (Cristina Marchetti)