La Usc di Ladins

L coronavirus seghita a fèr vitimes, ence te noscia picola val. L prum de oril te l’ospedèl de Ciavaleis, l’é mort l’ex marescial de la Polizia de Stat Federico Avico, clas 1924, n muie cognosciù per esser stat n atlet de nonzech ti egn ’50 e per sie contribut fondamentèl al Zenter de Adestrament alpin de la Polizia de Moena olache l’à lurà per duta sia vita.

Federico Avico l’era nasciù a San Michele di Mondovì te la provinzia de Cuneo. L’era jit melitar coi Alpins e endèna la seconda vera te le Langhe l’à scombatù da partejan e per chesta sia atività l’é ence stat te perjon. Fenì l conflit l’é ruà te Polizia, olache l’à tacà sia cariera sportiva desche atlet de schi e paslonch, ma ence saut e bob.

L’é stat a Torin, a Bologna e dò l’é jit a San Candido e a Passo Stalle sul confin con l’Austria, tel commissariat de confin. Del 1952 l’è stat manà a Moena, olache l’à seghità sia aventura sportiva coordenan l grop sportif de la Polizia, le Fiame Oro, nasciù del 1954, grop che à dombrà fegures de livel nazionèl desche Valentino Chiocchetti, Ottavio Compagnoni, Arrigo Delladio, Innocenzo Chatrian e Emiliano Wuerich.

A Moena Federico l’à ence metù sù familia: del 1959 l’à maridà Maria Eccher e da chela union l’é nasciù doi fies, Federica e Chiara.

Gran empegn l’à metù a ge stèr dò ai lurieres per la senta de la Scola Alpina de Moena, taché del 1960, realisèda passan via n muie de dificoltèdes ence de gra a sie fon enteressament.

L’é stat atlet e alenador fin del 1962 e te Scola de Polizia l’à portà inant desvaliva autra manscions fin del 1974, canche l’é jit en penscion. L’istituzion ampò la ge é semper restèda tel cher e l’é stat anter i fondatores de l’ANPS, Sociazion Nazionèla Polizia de Stat ensema con sacotenc ex atlec che ogne an se troèa a Moena ensema con el.  

Acà doi egn l’à publicà l liber Le Fiamme Oro nel cuore, olache vegn rejonà di sacotenc atlec che à scrit gran pèrt de la storia del grop sportif, de chel che Federico era stolz.

 (Cristina Marchetti)