La bela neva l’é che vegn avert la gejies e i fidei podarà jir a dir na orazion dedant al Santiscim e a la Madona. Ence la vijita personèla cogn ampò vegnir regolèda e per chest ge vel respetèr la desposizions: se dejenfetèr
{gallery}12568{/gallery}
la mans dant de jir ite, tegnir sù l couribocia, stèr dalonc un da l’auter. Don Mario e don Andrea à ence cognù endrezèr n servije de control acioche la desposizions vegne respetèdes, e donca i volontadives se darà l cambie per chest servije e la gejies sarà avertes a oraries aldò de la desponibilità.
Te la Val de Sora i à jà tacà i dis passé e fin a neva dezijions te la gejies de Ciampedel e de Cianacei se pel ite duc i dis da les 10 a les 11 dadoman e da les 4 a les 5 domesdì.
Te la Val de Sot enveze la gejies parochièles de Pera, Poza, Vich e Soraga les vegn avertes da lunesc ai 4, con oraries desferenc.
A Poza de lunesc da les 9 a les 10 dadoman e da les 5 a les 6 da sera; dal mèrtesc a la sabeda demò da les 5 a les 6 e de domenia da les 8 a les 10 e da les 5 a les 6.
A Vich la Pieif sarà averta dal lunesc a la sabeda da les 10 a les 12 dadoman; de vender e sabeda ence da les 4 a les 5 domesdì e de domenia da les 10 a les 11 e da les 4 a les 6 da sera.
A Pera la gejia sarà averta duc i dis da les 4 a les 6 domesdì e a Soraga enveze de mèrtesc da les 8 a les 10 dadoman, de jebia e de vender da les 4 a les 6 domesdì, de sabeda da les 10 a les 11 e da les 5 a les 6 domesdì e de domenia da les 9 a les 11.
A oraries stabilii te la jejies sarà a la leta ence l preve. I oraries e la desposizions é a la leta sul sit www.decanatodifassa.it e i é ence taché fora da la gejies.
Duc i fidei é preé de respetèr la desposizions e de scutèr i volontadives, per permeter de jir inant con chest servije.
Sul sit del decanat se pel troèr la orazions, i librec de la messa e l link per veder o scutèr duc i dis la zelebrazions en streaming, che vegn manèdes fora sul canal youtube Parrocchia Val di Fassa, a chel che se pel se scriver ite zenza aer brea de paèr nia.
La messa de la domenia vegn dita fora ence a Radio Studio Record da mesa les 10 da doman (9.30) e da trei chèrts da les 6 domesdì (17.45). En domenia ai 3 chesta messa é dedichèda ai Sènc Felip e Giacum, che stèsc sora a la comunanza de Ciampedel, e en lunesc ai 4 de mé Radio Studio Record manarà fora coi medemi oraries la messa grana en onor de Sèn Florian, patron de Cianacei.
(Lucia Gross)