Test sierologics per 2.111 sentadins

Data

28 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é tacà ite chisc dis l screening endrezà dal Comun general col prelief del sanch. Prest ence l’analisa volontèra col tampon da man de la Provinzia.


En dut 2.111 persones se à scrit ite ai test sierologics endrezé dal Comun general de Fascia adum coi Comuns de Mazin, Sèn Jan, Soraga e Moena. A chisc test podea se enscinuèr tant sentadins che no residenc e duc chi che à più che 14 egn.

A Mazin se à scrit ite 255 persones, tel Comun de Sèn Jan se à metù dant 1145 jent, a Soraga se à enscinuà 211 persones e a Moena 500.

Se trata de test sierologics col prelief del sanch, fidaboi e recognosciui, che l Consei de la Sanità del Comun general de Fascia e i ombolc à volù endrezèr per ge dèr l met ence ai sentadins de chisc cater comuns de saer se i à svilupà i anticorpes anti Sars-CoV2, indicatores che disc se se é vegnui a contat col virus e per stimèr coscita ence la dimenscion e l’estenjion de l’infezion te la popolazion.

I test fac da man di esperc del Grop Synlab é taché ite chesta setemèna, più avisa en jebia ai 28 de mé a Mazin te caserma di Studafech. En vender ai 29 i é a Soraga, en sabeda ai 30, lunesc al prum de jugn, mèrtesc ai 2 e mercol ai 3 i vegn fac a Sèn Jan, en ultima jebia ai 4 e vender ai 5 de jugn i sarà a Moena. I scric ite vegnarà contaté dal Comun con l’indicazion del dì e de l’ora del prelief ma se valgugn volessa amò se jontèr ite zenza aer far la enscinuazion i pel se prejentèr via per l domesdì da les 14.00 a les 16.00. I resultac vegnarà consegné te presciapech trei dis diretamenter a la persones che à fat l test. 

De più su La Usc stampèda de vender ai 29 de mé 2020.

 (Monica Cigolla)