La Usc di Ladins

A Pardac sul percors che da la piaza mena a la neva biblioteca, apede la veia stazion de la ferata de Fiem, l mur de la cort de Casa Agreiter te Via Pramaor, olache n’outa l’era la speziarìa, l’é stat fornì sù da murales che fegurea desvalives personajes storics realisé dai studenc del Liceo Artistich de Poza.
L’idea é nasciuda da la volontà de l’aministrazion de comun de Pardac de recalifichèr chel mur, tel chèder de n intervent più slarià per la realisazion de n nef zenter cultural.
Aldò de la desponibilità a se tor sù l’encèria da pèrt de la professora del Liceo Artistich Maria Pia Desilvestro, secondo l’iter pervedù ge é stat portà dant la domana a la Sorastanta Mirella Florian, che l’à aproà la scomenzadiva.
Donca, a una col Departiment de Materies Artistiches, al scomenz de l’an de scola l’é tacà via la projetazion apontin sot la vida de la professora Desilvestro.
Se é ponté demez da la conscidrazion che a Pardac l’era l’ultima stazion de la ferata che à abù regnèda fin di egn ’60 – l’à contà l’ensegnanta – i studenc de la 5 Laf à lurà fora l’idea pissan al percors che da la piaza va envers la veia stazion, l’é ciutà sù i conzec de ferata, viac, e la biblioteca à rechiamà l’idea de cultura, donca a la fin a la scomenzadiva ge é stat dat desche titol apontin »La ferata de la cultura«: a ge vardèr a l’opera la somea proprio na ferata, con chest mur lonch 30 metres e i personajes che somea esser ite ti vagons.

Podede troèr su La Usc di Ladins nr 26 di 3 de messèl l'articol entriech  (Cristina Marchetti)