La Usc di Ladins

L burt temp à endò fat dans te Fascia, chest’outa l’à tocià debel l paìsc de Vich. En lunesc sera ai 10 de aost l’é crepà na nigola e l’à dat jù de pien èga e bozoles soraldut te la pèrt de Piz e Val.

L ruf de le Arce, n pìcol ruf che vegn jù de Vael, che l’é stat encanalà ite sot tera te n tubo e l vegn fora tel ruf de Vael, l’é vegnù per sora e con gran forza l’é vegnù jù dret anter la cèses de Piz e Val magnan jù l teren con gregn dans, fajan ence bujes de n metro. L’èga é ruèda ite te la cèvenes, caldaies e garasc de la families che stèsc te chel cianton.

»Amò apede – ne à dit l comandant di Studafech da Vich Franco Pellegrin – se à moet via n toch teren e l’à smolinà jù. Per precauzion aon cognù far jir fora de ciasa na cincantina de persone anter jent da Vich e foresć che stasc te le ciase sora la senta de la Crousc Checena e ló da l’Hotel Andes. Duc à troà alberch per passar la not, l’é stat avert l’Hotel Rosa e l’Hotel Corona che chest istà é resté seré. En martesc da doman i à podù jir ite deretorn te soe ciase. Per fortuna che l’é na roba isolada e che se pel tegnir sot control con opere de drenage. Sion stac sul post duta not ensema ai Studafech da Poza, chi da Soraga e ence chi da Cianacei che i é vegnui a ne didar con le lum. Anché bonora (en mèrtesc ai 11 de aost, ndr) l’é vegnù sù l geologh de la Provinzia de Trent co l’elicoter a controlar la situazion e dezider che far per meter en segureza le ciase e far le opere de contegniment del ruf de le Arce.« L gran temporal à fat dans ence sun strada Veia e de Costa e te etres ciantons del paìsc de Vich.  (Monica Cigolla)